ۇرپاق ساباقتاستىعىنىڭ ۇزىلۋىنە جول بەرمەگەن ءجون
ال ول ءۇشىن قازىرگى الەم ادەبيەتىندە قاي جانر، قاي باعىت، ءتىپتى كەرەك دەسەڭىز، قاي ستيل ءوتىمدى، الەم وقىرماندارىنىڭ تالعامى، ەرۋديتسياسى نەنى تالاپ ەتەدى، وسى تۇرعىدان ماعلۇمات كەرەك. ادەبيەت قازىر - شوۋ، بيزنەس. ءسىز كوركەمدىكپەن، ماعىنامەن بۇل تۇڭعيىقتان مالتىپ شىعا المايسىز.
سوندىقتان ادەبيەتتەگى زاماناۋي اعىمدار مەن قويىلاتىن تالاپتار جوو- نا ارنايى ءپان رەتىندە بەرىلۋى كەرەك... سول ستاندارتتاردى ساناسىنا ءسىڭىرىپ وسكەن الدەبىر جاس جۇزدەن جۇيرىك، مىڭنان تۇلپار، قازاق ادەبيەتىن الەم نازارىنا الىپ شىعار.
سودان كەيىنگى ماسەلە - قازاق ادەبيەتى ءۇشىن الەم نەمەنەگە كەرەك؟ الەمسىز- اق ادەبيەتىمىز بار، اقىن- جازۋشىلارىمىز، اۋدارماشىلارىمىز، عالىمدارىمىز جۇمىس ىستەپ جاتىر. ءبىر-ءبىرىمىزدى تانيمىز، بىلەمىز، وقيمىز. قايناعان تىرلىك، بىلاي قاراپ تۇرساڭىز. دۇنيەگە كەلىپ، باقيعا اتتانىپ دەگەندەي... الەم تۇرماق ءوزىنىڭ قالامگەرلەرىن قازاقستان بىلمەيدى. ادەبيەتكە، جازۋ- سىزۋعا بەيىمى بار نەمەسە كاسىبى بايلانىستا بولماسا، بىلايعى جۇرتتان ادەبي پروتسەستى سەرگەك باقىلاپ وتىرعان جان جوق. ءبىراق سيتۋاتسيا ساعىمىزدى سىندىرماق ەمەس. جازىپ جاتىرمىز. قالامىمىزدى تاستاعان جوقپىز. سونداي جاعداي. ازداپ كوڭىلسىزدەۋ. ءبىراق ءومىر سۇرۋگە بولادى. ءبىزدىڭ ماقسات - ۇلتتىق ادەبيەتتى ساقتاپ قالۋ. ۇرپاقتار ساباقتاستىعىنىڭ ۇزىلۋىنە جول بەرمەۋ. ماڭدايعا جازىلعان ميسسيا وسى.
ال «يزمداردى» تانۋ دەگەندە، بۇل جەردە بوتەلكەنىڭ باسىن ادەبيەتتانۋشى، سىنشى قاۋىمعا بۇرۋ كەرەك شىعار. جىكتەۋ، سالالاۋ، ايدار تاعۋ سول كىسىلەردىڭ قۇزىرىنداعى وكىلەت ەمەس پە؟! ال ادەبيەتتىڭ «قارا جۇمىسشىلارى» جازۋشىلار مەن اقىندار بولسا، بۇل تاقىرىپتى كاسىبي تۇردە الىپ شىعا الماس. قالاي دا ەموتسيا باسىم بولىپ كەتىپ جاتادى. ادەتتە.
ادەبي پروتسەستى جاساندى تۇردە، جوسپارلى جولمەن وزگەرتۋ قيىن، ءبىراق ارينە، مۇمكىن. دەگەنمەن، بۇل جۇمىستى قولعا الىپ، ونداي ناۋقاندى باستاپ جىبەرۋگە قۇلشىنىپ وتىرعان توپتار دا، قۇرىلىمدار دا كورىنبەيدى. ادەبيەت يدەولوگيا قۇرالى بولۋدان قالعالى، الابوتەن ەشكىمدى قىزىقتىرمايتىن دا بولدى. باقىتىمىزعا وراي. ادەبيەتكە جارناما كەرەك، كىتاپ شىعارۋ كەرەك، شىققان كىتاپتاردى تالقىلاۋ، باعالاۋ كەرەك. ساپا ستاندارتتارىن بەلگىلەۋ، تالاپ ەتۋ كەرەك. ءبىر سوزبەن ايتقاندا، بۇل سالاعا دا مودەرنيزاتسيا، رەفورما كەرەك. باياعىدا وتكەن ءبىر اپكەمىز «ونداي بايدى بىزگە كىم بەرىپتى» دەيدى ەكەن. سول سياقتى، بۇنىڭ بارلىعى ايتىلىپ كەلە جاتقان نارسەلەر عوي، تەك وزگەرىپ جاتقان ەش نارسە جوق. ازىرگە!..
مادينا وماروۆا، جازۋشى
«قازاق ادەبيەتى» گازەتى.