قىتايداعى گران- پريگە قازاقستاننان توعىز زىلتەمىرشى قاتىسادى

فوتو: None
استانا. قازاقپارات - 21-23 - قىركۇيەكتە وتەتىن قىتاي گران- پريىنە ەلدەن 9 زىلتەمىرشى قاتىسادى.

 قىتايدا اۋىر اتلەتيكا بويىنشا گران- پري ريوداعى وليمپيادا ويىندارىنىڭ الدىنداعى ليسەنزيالىق باسەكە مارتەبەسىنە يە.

 قازاقستاننان بۇل تۋرنيرگە توعىز سپورتشى قاتىسادى: فارحاد حاركي (69 كەلى)، كيم الەكساندر (69 ك گ)، پاۆلوۆ كيريلل (77 ك گ)، كازوۆ ايدار (77 ك گ)، ليندەر سەمەن (85 كەلى)، نيدجات راگيموۆ (85 كەلى)، ءسادۋاقاسوۆا ساۋلە (63 كەلى)، سيۆانبايەۆا فاينا (69 كەلى)، سادىقوۆا اسەم (69 كەلى).

 «بۇل تۋرنير ليسەنزيالىق بولىپ تابىلادى. سوندىقتان نەگىزگى مىندەتىمىز الدا وتەتىن ريوداعى وليمپيادا ويىندارىنا جولداما الۋ. جۇيە بىلاي: وليمپياداعا قاتىسۋ ءۇشىن كەم دەگەندە ەكى ليسەنزيالىق ويىنعا قاتىسۋ قاجەت. وتكەن جىلى ءبىزدىڭ جىگىتتەر ازيا ويىندارىنا، الەم چەمپيوناتىنا قاتىستى، بيىل پەرۋدەگى جاستارعا ارنالعان الەم چەمپيوناتى ءوتتى، الدا قىتايداعى گران- پري. حيۋستوندا ءا چ جانە وسى جىلعى جەلتوقساندا گروزنىيدا ليسەنزيالىق تۋرنير وتەدى.

 2016 - جىلى وليمپيادا ويىندارى الدىندا سامارقاندتاعى ازيا چەمپيوناتىندا جەتپەي قالعان بالداردى الۋ مۇمكىندىگىمىز بار. ال ول جەردە وليمپياداعا تولىق دايىندىق باستالادى. سوندىقتان وسى جىلى ەكى بال قوسۋىمىز قاجەت. سپورتشىلاردى سالماق ساناتى بويىنشا ءۇش توپقا بولدىك: بىرەۋى قىتايعا (ەرلەر 85 كەلىگە دەيىن، ايەلدەر 69 كەلىگە دەيىن) ، ەكىنشىسى الەم چەمپيوناتىنا دايىندالۋدا، ءۇشىنشىسى گروزنىيدا ءوز كۇشىن سىنايتىن بولادى (ەرلەردە 94 كەلى جانە ودان جوعارى، ايەلدەر 75 كەلى جانە ودان جوعارى)»، - دەدى الداعى وتەتىن جارىستار جايلى قازاقستان اۋىر اتلەتيكا بويىنشا ۇلتتىق قۇرامانىڭ باس باپكەرى الەكسەي ني.

ونىڭ ايتۋىنشا، قىتايعا كۇللى الەمنەن جينالادى، ۇيىمداستىرۋشىلار سىيلىققا - 8000، 5000 جانە تيىسىنشە 3000 دوللار ءبولىپ وتىر.

«بۇل تۋرنيردە ارنايى تالاپ قويمايمىز. بۇل سپورتشىلاردىڭ تانىپ- ءبىلۋ، باپكەرلىك شتابتىڭ بارلاۋ جولى. ءا چ قۇرامىن، كىم، قانشا كوتەرەتىنىن باعامدايمىز»، - دەپ اتاپ ءوتتى ا. ني.