شىعىس قازاقستاندا قونجىعى ولتىرىلگەن اشۋلى ايۋ اۋىلدى تورۋىلداپ ءجۇر
جاقىندا اۋىلدىڭ ءبىر تۇرعىنى ءىز- ءتۇزسىز جوعالىپ، ايۋدىڭ ازۋى مەن تىرناعىنىڭ ءىزى قالعان ءمايىتى تابىلدى. جەرگىلىكتى تۇرعىنداردىڭ ايتۋىنشا، وسى وقيعادان ءبىرشاما ۋاقىت بۇرىن جۇك كولىگى ايۋدىڭ قونجىعىن ابايسىزدا قاعىپ كەتكەن ەكەن.
ورمان تاعىسى ادامعا وسى سەبەپتى شابۋىلداعان بولۋى مۇمكىن. مەدۆەدكا اۋىلىنىڭ 65 جاستاعى تۇرعىنى ەلدى مەكەننەن 15 شاقىرىم جەردەگى قالىڭ ورمانعا ساڭىراۋقۇلاق تەرۋگە كەتكەن. وتباسىنا ورالماعان وتاعاسىنىڭ بالالارى كەلەسى كۇنى پوليتسياعا شاعىمدانادى. ۇلى ۆيتالي بەلوكوپىتوۆ پوليتسيا ساقشىلارى ارىزدى الىپ كەتكەننەن كەيىن كەلەسى كۇنى كەلمەگەنىن، اكەسىن الدىمەن وزدەرى ىزدەگەنىن ايتادى. ءۇشىنشى كۇنى عانا اۋداندىق ىشكى ىستەر باسقارماسى قىزمەتكەرلەرى مەن جەرگىلىكتى اڭشىلار جوعالعان تۇرعىندى ىزدەۋگە شىققان. الدىمەن اۋىلدان ءۇش- اق شاقىرىم جەردەگى بۇتاقتار اراسىنان ايۋ كەزدەسىپتى. اسپانعا وق اتقاننان كەيىن جىرتقىش اڭ نۋ توعايعا قاراي قاشىپ كەتەدى.
اڭشى اندرەي يۋرتايكيننىڭ ايتۋىنشا، ىزدەۋ جۇمىستارىنىڭ بەسىنشى كۇنىندە عانا جوعالعان تۇرعىن تابىلىپتى. الايدا، تاعى حايۋاننىڭ ابدەن تالاۋىنا تۇسكەن ءمايىتتىڭ ارشا- بورشاسى شىققان ەكەن. - قىلمىستىق ىزدەستىرۋ ءبولىمى قىزمەتكەرلەرى مەن ۋچاسكەلىك پوليتسەي ورماندى ءسۇزىپ شىقتى. 15 ادام جۇمىلدىرىلعان ىزدەستىرۋ كەزىندە قان جوسا بولعان ادام دەنەسى تابىلدى. دەنەدەگى ىزدەردىڭ ايۋدىڭ تىرناعى مەن ازۋىنان قالعانىن اڭشىلار انىقتادى، - دەيدى شەمونايحا ا ى ى ب كريمينالدىق پوليتسيا ءبولىمىنىڭ باستىعى سەرىك ورازوۆ. سودان بەرى مەدۆەدكالىق تۇرعىنداردىڭ مازاسى كەتتى. ويتكەنى، قونجىعىنىڭ ولىمىنە اشۋلى ايۋ اۋىلدى ءالى تورۋىلداپ جۇرگەن كورىنەدى. ءتىپتى، ۇرەيى ۇشقان ومارتاشىلاردىڭ تاستاپ كەتكەن ومارتالارىنا «يەلىك» ەتىپ، ۇيالاردى تالقانداپ، بالاۋىزداردى شىعارىپ تاستاعان. تۇرعىندار اۋىلداعى شەتكى ۇيگە 20 مەتردەي جاقىن كەلگەن ايۋدىڭ ءىزىن كورىپتى. اتىن سۋارۋعا بارعان تۇرعىنداردىڭ ءبىرى، كومىپ تاستاعان ايۋ جەمتىگىنىڭ ءيىسىن سەزگەنىن ايتادى.
ارتەم پيساريەۆ ەسىمدى تۇرعىننىڭ ايتۋىنشا، ءتۇن بالاسىندا اۋىل يتتەرى ۇلارداي شۋلاپ، جىلقىلار جايىلىمعا شىقپايتىن بولعان. قازىر ورمان تاعىسىن ۇستاۋعا بارلىق كۇش جۇمىلدىرىلدى. جەرگىلىكتى اڭشىلار دا ىزىنە تۇسۋگە قۇلشىنىپ وتىرعانىمەن، ايۋدى اتۋعا رۇقسات جوقتىعىن العا تارتادى. براكونەرلىككە كەسىلەتىن ايىپپۇل - 500 مىڭ تەڭگە. وبلىستىق تابيعي رەسۋرستار جانە تابيعاتتى پايدالانۋدى رەتتەۋ باسقارماسى جەتەكشىسىنىڭ ورىنباسارى ۆيتالي چەرنەتسكي اڭشىلىق ماۋسىمى اشىلماعان كەزدە اڭدى اتۋعا جىل بويى قارۋ ۇستاۋعا رۇقساتى بار عانا ادامدار تارتىلاتىنىن ايتادى. بۇگىندە مەدۆەدكا كوشەلەرى يەسىز قالعان جۇرتتاي كۇندىز دە قاڭىراپ تۇرادى. ويتكەنى، تۇرعىندار ۇيدەن شىعۋعا ۇرەيلەنەدى.
دۋمان اناش، «ەگەمەن قازاقستان» . شىعىس قازاقستان وبلىسى، شەمونايحا اۋدانى.