تەڭگەنىڭ دوللارعا شاققانداعى باعامىنىڭ ءوسۋى بيۋدجەتتىڭ كىرىسىن ارتتىرىپ وتىر - قارجى مينيسترلىگى

استانا. قازاقپارات - تەڭگەنىڭ دوللارعا شاققانداعى باعامىنىڭ ءوسۋى بيۋدجەت كىرىستەرىن ارتتىرىپ وتىر.

بۇگىن ماجىلىستە «2016-2018 -جىلدارعا ارنالعان رەسپۋبليكالىق بيۋدجەت تۋرالى» زاڭ جوباسىنىڭ تانىستىرىلىمى بارىسىندا قارجى ءمينيسترى باقىت سۇلتانوۆ وسىلاي مالىمدەدى.

«2016 -جىلعى بيۋدجەتتىڭ كىرىستەر بولجامى اعىمداعى جىلدىڭ باعالاۋىمەن سالىستىرعاندا 350,5 ميلليارد تەڭگەگە نەمەسە 11,1 پايىزعا ۇلعايتىلىپ، 3 تريلليون 2013 ميلليارد تەڭگە سوماسىندا ايقىندالدى. كىرىستەردىڭ وزگەرۋىنە ءبىرقاتار باستى فاكتورلار اسەر ەتىپ وتىر. اتاپ ايتقاندا، كىرىستەردىڭ ءبىر جاعىنان 720 ميلليارد تەڭگەگە ۇلعايۋى ماكروەكونوميكالىق كورسەتكىشتەردىڭ وزگەرۋىنە، بيۋدجەتتەن قوسىلعان قۇن سالىعىن قايتارۋ سومالارىن ازايتۋعا، تەڭگەنىڭ اقش دوللارىنا شاققانداعى باعامىنىڭ وسۋىنە بايلانىستى، سونىمەن بىرگە سالىقتىق اكىمشىلەندىرۋدى جاقسارتۋ ەسەبىنەن قالىپتاساتىن بولادى»، - دەيدى مينيستر.

ونىڭ ايتۋىنشا، كەلەر جىلعى بيۋدجەتتىڭ كىرىستەرىن 350 ميلليارد تەڭگەگە ازايتاتىن فاكتورلار دا بار. ولار نەگىزىنەن مۇنايعا ەكسپورتتىق كەدەندىك باجدىڭ تونناسى ءۇشىن 60 دوللاردان 40 دوللارعا دەيىن تومەندەۋى ەسەبىنەن قالىپتاسىپ وتىر.

«2017-2018 -جىلدارى رەسپۋبليكالىق بيۋدجەتكە كىرىستەر ءتۇسىمى الدىڭعى جىلدىڭ دەڭگەيىنە قاراعاندا سايكەسىنشە 211 ملرد جانە 407 ملرد تەڭگەگە ۇلعاياتىن بولادى»، - دەدى ب. سۇلتانوۆ.

اۆتور: قانات مامەتقازى ۇلى