قازاقستاندىق قاجىلار قاسيەتتى مەكەنگە اتتاندى
قاجىلىق عيباداتىن وتەۋ - اللانىڭ ۇلى نىعمەتى. نايب ءمۇفتي سەرىكباي قاجى وراز وسىنداي ساۋابى تەڭدەسسىز ۇلى ساپارعا بارۋىمىز اۋەلى جاراتۋشى يەمىزدىڭ، سودان كەيىن تاۋەلسىزدىگىمىزدىڭ ارقاسىندا جۇزەگە اسىپ جاتقانىنا توقتالدى.
«قاجىلىق - ساۋاپتى ساپار، قيىندىعى مول، رياسىز تاقۋالىقتى تالاپ ەتەتىن عيبادات. سىزدەر دۇعا- تىلەك قابىل بولاتىن ورىندارعا بارا جاتىرسىزدار. سوندىقتان قاسيەتتى ورىنداردا ەلىمىز ءۇشىن، حالقىمىزدىڭ ىنتاماعى پەن بىرلىگى ءۇشىن، وتباسىلارىڭىزدىڭ اماندىعى مەن ساۋلىعى ءۇشىن باتا جاساڭىزدار. مۇحاممەد پايعامبارىمىز (اللانىڭ وعان يگىلىگى مەن سالەمى بولسىن) «قابىل بولعان قاجىلىقتىڭ قايتارىمى - تەك قانا ءجاننات» ، - دەگەن. قاسيەتتى ساپارعا اتتانعان بارشا قاجىلارعا ءسات ساپار تىلەيمىز» ، - دەدى نايب ءمۇفتي سەرىكباي قاجى وراز.
بيىل ەلىمىزدىڭ قاجىلارى قاسيەتتى ساپارعا جول تارتپاس بۇرىن الدىن الا تىڭعىلىقتى دايىندىقتان ءوتتى. ءدىن قىزمەتكەرلەرى مەككەگە باراتىن جاماعاتتىڭ ءدىني ساۋاتىن اشىپ، قاجىلىق امالدارىن قالاي وتكەرۋ كەرەكتىگىن ۇيرەتتى. ءتىپتى ءارقايسىسىنىڭ دەنساۋلىعى دا ءجىتى تەكسەرۋدەن ءوتتى. ايتا وتەيىك قاجىلارعا وتىز شاقتى يمامدار مەن دارىگەرلەر قىزمەت كورسەتەتىن بولادى.
muslim.kz