ساۋد ارابياسىنىڭ كورولى مەككەدەگى قايعىلى وقيعانىڭ سەبەپتەرىن جاريالاۋعا ۋادە بەردى
10:30, 13 - قىركۇيەك 2015
استانا. قازاقپارات - ساۋد ارابياسىنىڭ كورلى سالمان يبن ءابدۋلازيز ءال- ساۋد مەككەدە تاياۋدا جۇزدەن استام ادام قازا تاپقان ءال- احرام مەشىتىندە ورىن العان وقيعانى تەرگەۋ قورىتىندىلارىن كوپشىلىك الدىندا جاريالاۋدى ۋادە ەتتى.
«ءبىز وقيعانىڭ سەبەپتەرىن انىقتاپ، سودان كەيىن ازاماتتارعا تەرگەۋ قورىتىندىلارى تۋرالى ايتامىز»، - دەپ ۋادە ەتتى مونارح. ونىڭ ايتۋىنشا، وقيعانى تەرگەۋ امالدارى باستالىپ كەتتى.
ساۋد مونارحى مەشىتتىڭ وزىندە بولىپ، ودان كەيىن قايعىلى وقيعا سالدارىنان زارداپ شەگىپ، اۋرۋحانادا جاتقان ادامدارعا باردى.
ساۋد ارابياسى ازاماتتىق قورعانىس دەپارتامەنتىنىڭ باسشىسى، لەيتەنانت سۇلەيمان بين-ابدوللا ءال-ءامر كراننىڭ قۇلاۋىنا داۋىلدى جەل مەن نوسەر جاڭبىر سەبەپ بولعانىن مالىمدەدى.
جۇما كۇنى مەككەدەگى ءال-احرام مەشىتىنىڭ ۇستىنە قۇرىلىس كرانى قۇلادى. وقيعا كەزىندە مەشىت ىشىندە جۇزدەگەن مۇسىلمان بولعان. سونىڭ سالدارىنان، سوڭعى مالىمەتتەر بويىنشا، 107 ادام قازا تاۋىپ، 200 دەن استامى جاراقات الدى.