استانادا قىمىز مەيرامى اتالىپ وتۋدە - فوتورەپورتاج
«قىمىز مەيرامى» فولكلورلىق-ەتنوگرافيالىق مەرەكەسى دەپ اتالاتىن شارا «اتامەكەن» ەتنو- مەموريالدىق كەشەنىندە ۇيىمداستىرىلدى.
مەرەكەگە استانا تۇرعىندارى مەن قوناقتارى ءۇشىن 2 كيىز ءۇي تىگىلىپ، قىمىز، ىستىق باۋىرساق پەن باسقا دا قازاقتىڭ ۇلتتىق تاعامدارى ۇسىنىلدى. كەلۋشىلەرگە استاناداعى قاليبەك قۋانىشبايەۆ اتىنداعى اكادەميالىق قازاق مۋزىكالىق دراما تەاترى ارتىستەرىنىڭ اتا- بابامىزدان قالعان «كەلىن ءتۇسىرۋ» سالت- جوراسىن جانە قازاقتىڭ ۇلتتىق سۋسىنى تۋرالى تەاترلاندىرىلعان قويىلىمى كورسەتىلدى. كەشەن اۋماعىندا التىباقان ورناتىلىپ، ءارالۋان ۇلتتىق كيىم تۇرلەرى كوپشىلىك نازارىنا ۇسىنىلدى.
شارانى ۇيىمداستىرۋشى استانا وپەرا مۇراجايىنىڭ ديرەكتورى اپريزا قۇسايىن قىزى قىمىزدىڭ سالاۋاتتى ءومىر سالتىن قالىپتاستىرۋدا ماڭىزى زور ەكەنىن ايتتى.
«قازاق حاندىعىنىڭ 550 جىلدىعى مەن اسسامبلەيانىڭ 20 جىلدىعىن مەرەكەلەۋ اياسىندا وتكىزىلىپ وتىرعان بۇل شارامىز «قىمىز مەيرامى» فولكلورلىق-ەتنوگرافيالىق مەرەكەسى دەپ اتالادى. قىمىزدىڭ، ەڭ الدىمەن، ادام دەنساۋلىعىنا ەمدىك قاسيەتى باسىم. ىشكەن ادامنىڭ بويىن سەرگىتىپ، بۇكىل اعزالارىن قۋاتتاندىرادى. قازىرگى ۋاقىتتا قالامىزدىڭ قاي جەرىنەن بولماسىن قىمىزدى ساتىپ الا الاسىز. قاسيەتى مول بۇل سۋسىن ەكىنىڭ ءبىرىنىڭ ۇيىنەن تابىلادى دەۋگە بولادى. بۇل - وتە ۇلكەن قۋانىش. ويتكەنى ۇلتتىق سۋسىن قىمىزدىڭ سالاۋاتتى ءومىر سالتىن قالىپتاستىرۋدا ءرولى زور. سوندىقتان ءبىز قوس مەرەكەنىڭ قۇرمەتىنە وراي، سالاۋاتتى ءومىر سالتىن دارىپتەۋگە ءوز ۇلەسىمىزدى قوسۋ ءۇشىن وسىنداي مەرەكە ۇيىمداستىرىپ وتىرمىز»، - دەدى ا. قۇسايىن قىزى.
سونىمەن قاتار، «قىمىز مەيرامى» فولكلورلىق- ەتنوگرافيالىق مەرەكەسىندە بۇركىتشىلەر دە ءوز شەبەرلىكتەرىن ورتاعا سالاتىن بولادى. اتالعان ونەر ۇجىمى كەلۋشىلەرگە قازاقتىڭ ۇلتتىق سۋسىنى تۋرالى تەاترلاندىرىلعان قويىلىمىن ۇسىندى.
مەرەكە قوناقتارى ارقان تارتۋ جانە قول كۇرەسى سىندى ۇلتتىق ويىنداردا كۇش سىناستى. سونداي- اق، قالا تۇرعىندارى قىمىز ءىشۋ سايىسىنا قاتىسىپ، اتالعان سۋسىن تۋرالى بىلگەندەرىن ورتاعا سالدى.
ساعات 11:00-18:00 دەيىن جالعاساتىن مەرەكەگە كەلۋشىلەر قىمىزدان ءدام تاتىپ، قازاقتىڭ ۇلتتىق سۋسىنىنىڭ تاريحىمەن تانىسادى.
بەيسەن سۇلتان ۇلى