قازاقتى وزگە ۇلتتان دارالايتىن ونىڭ ءتىلى، مادەنيەتى مەن رۋحانياتى - ەلباسى
«ەلىمىز ەگەمەندىگىن العاننان كەيىن جاعدايدىڭ قيىندىعىنا قاراماستان تاعدىردىڭ جازۋىمەن دۇنيەنىڭ ءتورت بۇرىشىنا تارىداي شاشىلعان ميلليوننان استام قانداستارىمىزدى اتامەكەنىنە ورالتتىق. بۇل كوش ءالى دە جالعاسۋدا. بابالار تاريحىنا قاتىستى دۇنيەءجۇزىنىڭ ارحيۆتەرىندە شاڭ باسقان تاريحي قۇجاتتاردى الدىرىپ، توم- توم كىتاپتار مەن وقۋلىقتار شىعارىپ، اتا تاريحىمىزدىڭ اقيقاتىن تۇگەندەدىك»، - دەدى ن. نازاربايەۆ.
سونىمەن قاتار، پرەزيدەنت تاۋەلسىزدىك جىلدارىندا 1 مىڭ 300 گە جۋىق مەكتەپ، 1200 گە جۋىق دەنساۋلىق ساقتاۋ نىسانى، تاعى دا ءتورت مىڭنان استام بالاباقشا سالىنعانىن، حالىقتىڭ ءال- اۋقاتى ارتىپ، ورتاشا ءومىر ۇزاقتىعى 72 جاسقا دەيىن ۇزارعانىن اتاپ ءوتتى.
«ازاتتىقتىڭ العاشقى جىلدارىندا «بولاشاق» باعدارلاماسى قابىلدانىپ، ون مىڭنان استام تالانتتى جاستاردى شەتەلدەردىڭ ەڭ بەدەلدى ۋنيۆەرسيتەتتەرىندە وقىتتىق. سول ۋنيۆەرسيتەتتەردى بىتىرگەندەر بۇگىن ەلگە كەلىپ، ۇلت بولاشاعىنا قىزمەت ەتۋدە. كەمەلىمىزگە كەلگەن سوڭ بارشا ورتا ءبىلىم وشاقتارىنا ۇلگى بولسىن دەپ رەسپۋبليكامىزدىڭ ءار وڭىرلەرىندە دۇنيەجۇزىنىڭ ەڭ بيىك تالاپتارىنا ساي زياتكەرلىك مەكتەپتەرىن اشتىق. ال كۇللى جوعارى ءبىلىم وردالارى بيىل العاشقى تۇلەكتەرىن ۇشىرىپ، الەمدىك دەڭگەيدە تانىلىپ ۇلگەرگەن نازاربايەۆ ۋنيۆەرسيتەتىنە قاراپ بوي تۇزەيدى. «مادەني مۇرا» باعدارلاماسى بويىنشا اتا- بابامىزدىڭ اسىل- مۇراسىن جيناقتاعان سوڭ، الەمدەگى ەڭ جاڭاشىل ونەر وردالارى سالىندى. بۇلار ارقىلى ءبىز ۇلت مادەنيەتىن الەمدىك وركەنيەت دەڭگەيىنە شىعارۋ ءۇشىن بارلىق جاعدايدى جاسادىق دەي الامىز»، - دەدى ەلباسى.
اۆتور: قانات مامەتقازى ۇلى