استانا دوستى سۇيىندىرەدى، دۇشپاننىڭ مىسىن باسادى - مەملەكەت باسشىسى
بۇل تۋرالى بۇگىن تاۋەلسىزدىك سارايىندا قازاق حاندىعىنىڭ 550 جىلدىق مەرەيتويىنا ارنالعان سالتاناتتى جيىن بارىسىندا مەملەكەت باسشىسى نۇرسۇلتان نازاربايەۆ ءمالىم ەتتى.
«مىنا استانانىڭ تورىندە وتىرىپ، بۇگىندە بار قازاقتىڭ ورتاق ماقتانىشىنا اينالعان ەلوردامىز تۋرالى ايتپاۋ مۇمكىن ەمەس. استانامىز - جاھانعا تانىلعان جۇرتىمىزدىڭ جارقىراعان جاقۇتى، ازاماتتارىمىزدىڭ التىن قىرانى. ەلوردانى سالۋ تاۋەلسىز قازاقستاننىڭ وتە كۇردەلى ماقسات قويىپ، ونى تاباندىلىقپەن ورىنداي الاتىنىن كۇللى الەمگە ايقىن دالەلدەپ بەردى.
باس قالامىز قازاقتىڭ ابىرويىن اسىرىپ، مەرەيىن تاسىتتى. دوستى ءسۇيىندىرىپ، دۇشپاننىڭ مىسىن باساتىن ەڭسەلى ورداعا اينالدى. استانامەن بىرگە قالىڭ قازاقتىڭ دا داڭقى ارتتى. ەلىمىزدىڭ ءار وڭىرىندەگى باسقا قالالار مەن ەلدى مەكەندەر دە ەلورداعا قاراپ بوي تۇزەپ، جارقىراي باستادى. بۇگىنگى تورقالى تويىمىز وتەتىن تاۋەلسىزدىك سارايى مەن سپورت كەشەنى دە وسىنداي ەڭسەلى عيماراتتاردىڭ ءبىرى»، - دەدى ەلباسى.
اۆتور: كەنجەكەي توقتامۇرات قىزى