الماتى وبلىسىنىڭ اگرارشىلارى يننوۆاتسيالىق تەحنولوگيالاردى پايدالانا باستادى - فوتو

تالدىقورعان. قازاقپارات - الماتى وبلىسىنىڭ كليماتتىق جاعدايى كوكونىستەردى وسىرۋگە قولايلى. اسىرەسە كوڭىل پيازعا بولىنەدى.

پيازعا كوپ مولشەردە سۋ قاجەت بولعاندىقتان، ونى ءوسىرۋ ءۇشىن تامشىلاپ سۋارۋ جۇيەسى قولدانىلادى.

 الماتى وبلىسى شەڭگەلدى اۋىلىندا ورنالاسقان «پسحت قانات» ج ش س شارۋاشىلىعى 420 گەكتار اۋماقتا پيازدىڭ گوللانديالىق تۇقىمىنىڭ 8 ءتۇرىن وسىرەدى. مۇندا تامشىلاپ سۋارۋدىڭ يزرايلدىك تەحنولوگياسى پايدالانىلادى. بۇل سۋارۋمەن بىرگە تىڭايتقىشتاردى سۋمەن بىرگە دارىتۋعا مۇمكىندىك بەرەدى. سونىمەن قاتار سۋ 30 پايىزعا دەيىن ۇنەمدەلەدى.

420 گەكتار جەردەگى تامشىلاپ سۋارۋ جۇيەسى تولىق كومپيۋتەرلەندىرىلگەن. بۇل سۋارۋ ءۇردىسىن باسقارۋعا مۇمكىندىك بەرەدى.

 تامىزدىڭ سوڭىنان بەرى ءونىم جينالىپ جاتىر. وتكەن جىلى شارۋاشىلىق 420 گەكتاردان  24000 توننا پياز السا، بيىل كاسىپكەر بۇل كورسەتكىشتى كەم دەگەندە گەكتارىنان 80 تونناعا دەيىن كوتەرۋدى كوزدەپ وتىر.

ءونىم الماتى بازارلارىندا ساتىلادى، سونىمەن قاتار رەسەيگە شىعارىلادى.

 الماتى وبلىسىنىڭ وسىمدىك جانە مال شارۋاشىلىعىنا «بيزنەستىڭ جول كارتاسى-2020» باعدارلاماسى اياسىندا 4 ميلليارد تەڭگەدەن استام ينۆەستيتسيا قۇيىلىپ، 39 شارۋا قوجالىعىنا قولداۋ كورسەتىلدى.