قازاقستان قىلمىستىق ىستەردەگى ءوزارا كومەك تۋرالى امەريكاارالىق كونۆەنتسياعا قوسىلدى
كونۆەنتسيا 1992 - جىلى 23 - مامىردا ناسساۋدا جاسالعان. قۇجاتقا سايكەس، قاتىسۋشى مەملەكەتتەر تەرگەپ- تەكسەرۋدە، قىلمىستىق قۋدالاۋدا جانە سۇراۋ سالۋشى مەملەكەتتىڭ كومەك تۋرالى سۇراۋ سالۋى كەزىندە يۋريكديكتسياسى بار قىلمىستارعا جاتاتىن ءىس- ارەكەتتەردە ءبىر- بىرىنە ءوزارا كومەكتەر كورسەتەدى.
«بۇل - كونۆەنتسيا ەكىجاقتى ەمەس، كوپجاقتى قۇجات. وعان امەريكالىق كانادا، مەكسيكا، برازيليا، بوليۆيا، ۆەنەسۋەلا، كولۋمبيا، ارگەنتينا، چيلي، يامايكا سەكىلدى 26 مەملەكەت قوسىلعان. بۇل كونۆەنتسيانى قابىلداساق، وندا قىلمىستىق ىستەر بويىنشا قازاقستان اتالعان 26 مەملەكەتپەن ءوزارا كومەكتەر كورسەتۋگە بىردەن مۇمكىندىك الادى. ياعني، كونۆەنتسياعا قوسىلۋ ءۇشىن قازاقستانعا ءاربىر مەملەكەتتىڭ جەكە كەلىسىمى كەرەك ەمەس. سونىمەن قاتار، اتالعان كونۆەنتسيا - اشىق قۇجات. الداعى ۋاقىتتا قوسىلاتىن مەملەكەتتەر سانى دا كوبەيۋى مۇمكىن»، - دەدى زاڭ جوباسى بويىنشا بايانداعان ق ر باس پروكۋرور ورىنباسارى جاقىپ اسانوۆ.
ونىڭ سوزىنە قاراعاندا، قۇجاتتىڭ شەڭبەرىندە قۇقىقتىق كومەك بەرۋ، تەرگەۋ امالدارىن جۇرگىزۋ، اكتيۆتەردى مەملەكەتكە قايتارۋ شارالارى دا قامتىلىپ وتىر. قىلمىسكەردىڭ مۇلكىن ىزدەپ تابۋ، ونى تاركىلەۋ قاعيداتتارى دا رەتتەلەدى. قۇجاتتا كومەك كورسەتۋدەن باس تارتۋ قاعيداتتارى دا قامتىلعان. ماسەلەن، مەملەكەتتەردىڭ تەرگەپ- تەكسەرۋى جەكە ادامنىڭ نەمەسە ادامدار توبىنىڭ جىنىسى، ءناسىلى، الەۋمەتتىك جاعدايى، ۇلتى، ءدىني سەنىمى، يدەولوگياسى بويىنشا قىلمىستىق قۋدالاۋ، جازالاۋ ماقساتىندا باستالعان بولسا، ودان باس تارتىلۋى مۇمكىن.
پارلامەنت قابىلداعان قۇجات مەملەكەت باسشىسىنىڭ قول قويۋىنا جولدانادى.
اۆتور: قانات مامەتقازى ۇلى