ول حالىقارالىق عارىش ستانساسىنان جەرگە قازاق تىلىندە جازىلعان ماتىندەردى جولداۋشى ەڭ ءبىرىنشى ادام اتاندى.
ءبىز بۇعان دەيىن، 2008 -جىلى عارىشكەر تالعات مۇسابايەۆتىڭ عارىش كوگىنەن حابارلاسىپ، پرەزيدەنت نۇرسۇلتان نازاربايەۆتى استانا كۇنىمەن جانە ونىڭ 10 جىلدىق مەرەكەسىمەن قۇتتىقتاعانىن، سوڭىنان ەلباسىمەن قوسىلىپ، ابايدىڭ «كوزىمنىڭ قاراسى» ءانىن شىرقاعانىن جاقسى بىلەمىز. وسىلايشا كوك جۇزىنەن بىزگە العاش قازاقتىڭ اۋەلەگەن ءانى جەتىپ ەدى، ەندى ءدال سولاي بولىپ توگىلىپ، تۋعان تىلىمىزدە جازىلعان جازبالار تاراپ جاتىر. مۇنىڭ ءوزى قازىر ءوزىنىڭ ميكروبلوگىن كۇندەلىك ىسپەتتەس جازبا ورنىنا مۇقيات پايدالانىپ وتىرعان عارىشكەرىمىزدىڭ بەلسەندىلىگى ارقاسىندا مۇمكىن بولىپ وتىر.
العاش رەت جەر كىندىگى - بايقوڭىردان الپار اسپاننىڭ اياسىنا ارقىراپ شىعىپ العاننان كەيىن ايدىن ايىمبەتوۆ تۇسىنە جەردىڭ، ونداعى تىرشىلىكتىڭ كىرە باستاعانىن جازىپ ەدى. ول مۇنى: «قايىرلى تاڭ، جەرلەستەر مەن جەردەگى تۇرعىندار! جەردە عارىشتى قيالدايتىن ەدىم، عارىشتا تۇسىمە جەر كىرىپ ءجۇر. جۇمىستى جالعاستىرىپ جاتىرمىن. ماقسات كوپ، ۋاقىت از» ، دەپ كەلتىردى. بۇدان كەيىن ءبىزدىڭ عارىشكەرىمىز «داستارقان-6» عىلىمي تاجىريبەسىن ورىنداۋعا كىرىسكەنىن جەرلەستەرىنە جەتكىزۋگە اسىقتى. ونىڭ سەبەبى دە بار. سەبەبى، بۇعان قازاقتىڭ داستارقانى، سونىڭ ىشىندە قازاقشا اسىلعان ەت، سورپا مەن سۇزبە كىرەتىن ەدى. ول الەۋمەتتىك جەلىگە بۇل تۋرالى:
«داستارقان-6» ەكسپەريمەنتىن ورىنداۋعا كىرىستىم. ءبىرىنشى تاعام - سۋبليماتسيا تۇرىندەگى قازاقشا ەت. (...) سالماقسىز كۇيدە تاماقتانعان ۇيرەنشىكتى ەمەس. ەت ءدامدى، ءبىراق كەبىڭكى. سورپا جەتىسپەيدى (...) . «داستارقان-6» ەكسپەريمەنتىن جالعاستىرىپ جاتىرمىن. تاڭعى اسقا - سورپا مەن قۇرعاق سۇزبە» ، دەپ جازدى. بۇدان كەيىن حالىقارالىق عارىش ستانساسى ەكيپاجىنىڭ مۇشەلەرى ينتەرنەتكە استانانىڭ جانە كاسپي تەڭىزىنىڭ عارىشتان تۇسىرىلگەن سۋرەتىن جاريا ەتتى. ەلوردانىڭ عارىشتان تۇسىرىلگەن فوتوسىن NASA استروناۆى سكوتت كەللي ءوز Twitter پاراقشاسىندا جاريالادى. «قايىرلى تاڭ، قازاقستان! ايدىن ايىمبەتوۆپەن عارىش ستانساسىنىڭ بورتىندا بىرگە بولعان جاقسى. ونىڭ جاعدايى كەرەمەت!» ، دەپ جازدى ول.
قازاقستاندىق عارىشكەر ايدىن ايىمبەتوۆ تە وسى كەزدە عارىشتا تۇسىرىلگەن راسىمدەرىن جايىپ سالدى. ول ءوز Twitter پاراقشاسىندا كاسپي تەڭىزىنىڭ كەسكىن- كەلبەتىن ۇسىندى. كەشە قازاقستاندىق عارىشكەر حالىقارالىق عارىش ستانساسىندا ءوز ارىپتەستەرىمەن بىرگە عارىشتان پوليار شۇعىلاسىنىڭ سيپاتىن باقىلادى. وسى ساتتە NASA عارىشكەرى ميكروبلوگىنا عارىشتاعى پوليار شۇعىلاسىنىڭ بەينەتاسپاسىن سالدى. «مەنىڭ سىزدەرگە ارناعان ا ق ش- تاعى ەڭبەك كۇنىنە تارتۋىم» ، دەپ جازدى كەللي وسىعان وراي. ال ايدىن ايىمبەتوۆ كەلليدىڭ جازباسىنا كەلىسەتىنىن ءبىلدىردى.
ەسكە سالا كەتەيىك، «سويۋز- ف گ» زىمىران ۇشىرعىشى بيىلعى 2 - قىركۇيەك كۇنى استانا ۋاقىتى بويىنشا ساعات 10.38-دە بايقوڭىر عارىش ايلاعىنان عارىشقا ۇشىپ شىققان ەدى. ونىڭ ەكيپاجىندا قازاقستاندىق عارىشكەر ايدىن ايىمبەتوۆ، رەسەيلىك سەرگەي ۆولكوۆ جانە ەۋروپا عارىش اگەنتتىگىنىڭ استروناۆى اندرەاس موگەنسەن بار. «سويۋز ت م ا-18م» كەمەسى 4 - قىركۇيەكتە حالىقارالىق عارىش ستاناسىمەن ءتۇيىستى. باستاپقىداعى جوسپار بويىنشا موگەنسەن مەن ايىمبەتوۆ جەرگە 12 - قىركۇيەكتە ورالۋعا ءتيىس ەدى. ءبىراق، بۇعان ۇشۋ بارىسىندا وزگەرىس ەنگىزىلىپ، ساپار ءساتى ەكى تاۋلىككە قىسقاردى. ءسويتىپ، بۇل ەكى عارىشكەر 10 - قىركۇيەك كۇنى پلانەتامىزعا قاراي بەت تۇزەيتىن بولىپ وتىر.
رۋسلان يگىلىك
«ەگەمەن قازاقستان»