ارميانداردىڭ ارمانى

 استانا. قازاقپارات - تەك ۇل بالا سۇيگىسى كەلەتىن ارمەنيالىق اتا- انالار دۇنيە ەسىگىن اشىپ ۇلگەرمەگەن شاقالاق قىزدى قۇرساقتان الدىرىپ تاستاۋمەن كەلەدى.

سونىڭ سالدارىنان ەلدە دەموگرافيالىق ءوسىم باياۋلاپ، نازىك جانداردىڭ تۋۋ كورسەتكىشى ونداعان جىلدار بويى قالىپتى دەڭگەيگە كوتەرىلە الماي كەلەدى. وسىعان وراي، قۇزىرلى مينيسترلىك «رەپرودۋكتيۆتى دەنساۋلىق پەن قۇقىق تۋرالى» زاڭ جوباسىن ازىرلەپ وتىر. 

 بولاشاق بالانىڭ بارىن كورسەتىپ قويماي، ونىڭ جىنىسىن «سۇيىنشىلەيتىن» ۋلترادىبىستىق زەرتتەۋلەر كوپتەگەن ارميان وتباسىنا سۋىت حابار جەتكىزۋشى ىسپەتتى. سەبەبى ۇل قالايتىنداردىڭ كوبى تىلەگەنى كەلمەسە، ۇرپاعىن ولىمگە تىگە سالادى. 

 تامشىدان جارالىپ، تامىردان كەسىلگەن شاقالاقتاردىڭ ناقتى سانى قازىر بەلگىسىز. انىعى تۇسىكتەن ەتى تىتىركەنبەسە دە، شارتتى تۇردەگى «قىلمىسىن» اشىق ايتۋعا بەتى بارمايتىنداردىڭ قاراسى قالىڭ. ال ماسەلەنى نىساناعا العان مامانداردىڭ بۇگىنگى زەرتتەۋلەرى، ءتىپتى، جاعا ۇستاتارلىق. 

 ءبىزدىڭ زەرتتەۋلەرىمىزگە سايكەس، ەگەر 2060 - جىلعا دەيىن جاعداي وزگەرمەسە، ارمەنيادا 100 مىڭعا جۋىق شاقالاق قىز تۇسىكتىڭ قۇربانىنا اينالادى، ياعني بولاشاق انالاردىڭ سانى ەداۋىر كەميدى،  دەيدى ب ۇ ۇ حالىق ساناعى قورىنىڭ اتقارۋشى وكىلى گاريك ايراپەتيان. 

 ءدۇيىم ەلدى الاڭداتقان ماسەلەمەن تاياۋدا دەنساۋلىق ساقتاۋ مينيسترلىگى دە مىقتاپ اينالىسا باستادى. مامىر- ماۋسىم ايلارىندا ارنايى زاڭ جوباسىن ازىرلەپ، ۇلتتىق جيىننىڭ قاراۋىنا جىبەرگەن. 

 ب ۇ ۇ- نىڭ ارمەنيا بويىنشا جۇرگىزگەن ستاتيستيكاسىنا سايكەس، تۋۋ دەڭگەيىنىڭ تەپە- تەڭدىگى ەڭ قاتتى بۇزىلعان كورسەتكىش 2000 - جىلى تىركەلىپ، الشاقتىق 20 پايىزدى قۇراعان. بىلتىرعى احۋال دا كوڭىل كونشىتپەيدى. 

 ورتاشا ەسەپپەن 114 ۇلعا 100 قىزدان كەلىپ، قالىپتى دەڭگەيدەن 2,5 ەسەگە ارتىق اۋىتقۋ بايقالىپتى. ءۇش ميلليوننان اسار- اسپاس حالقى بار مەملەكەت ءۇشىن ايتۋلى زاڭ جوباسى اۋاداي قاجەت.