قىتاي ينۆەستورلارى شىعىس قازاقستان وبلىسىنا بالاباقشا سالادى
بۇل تۋرالى بۇگىن ايماق باسشىسى دانيال احمەتوۆ ارنامىزعا بەرگەن ارنايى سۇحباتىندا ايتتى.
اتالعان ماقساتتاعى العاشقى كەلىسىمشارتتارعا قول قويىلىپتى. شىعىس قازاقستان وبلىسى بۇل ءتاسىلدى تۇڭعىش رەت قولعا الىپ وتىر. وسكەمەندە 4 ميلليارد تەڭگەگە 6 بالاباقشا، سەمەيدە قۇنى 3 ميلليارد تەڭگەگە جۋىقتايتىن تاعى 5 مەكتەپكە دەيىنگى مەكەمە سالىنىپ جاتىر.
ناقتىراق توقتالساق، قازاقستان تاراپى قىتاي مەن تۇركيا كومپانيالارىنىڭ قۇرىلىسىنا قاجەتتى جەر تەلىمدەرى مەن دايىن تيپتىك جوبالار ۇسىنادى. قۇرىلىس ايماقتارى دا بەكىتىلگەن. قارجىنى شەتەلدىك ينۆەستور ءوزى قۇيادى. ال، بالاباقشا قۇرىلىسى اياقتالعان سوڭ، ولار مەملەكەت مەنشىگىنە تاپسىرادى. سوندا عانا مەملەكەت قۇرىلىس مەكەمەسىنە كەزەڭ- كەزەڭىمەن ەسەپتەسەدى.
دانيال احمەتوۆ، شىعىس قازاقستان وبلىسىنىڭ اكىمى:
ناتيجەسىندە قۇرىلىس تولىقتاي اياقتالعانشا، بيۋدجەتتەن ءبىر تيىن دا جۇمسالمايدى. كەيىن بىرتىندەپ 7 جىلدان استام مەرزىم ىشىندە تولەپ بەرەدى. ال شەتەلدىك كومپانيا مەكتەپكە دەيىنگى مەكەمەنى باسقارادى، قوسىمشا ديۆيدەندتەر الادى. مەملەكەتتىك تاپسىرىس الۋعا دا كومەكتەسەمىز. وسىلايشا كونسەسسيالىق قۇرىلىس ارقاسىندا بالاباقشالارداعى ورىندى 2016 - جىلدىڭ 1 - شىلدەسىنە دەيىن 4 جارىم مىڭ ورىنعا جەتكىزۋىمىز كەرەك. بۇل ءبىر جاڭا ءىستىڭ باستاماسى.
بىزگە بەلگىلى بولعان تاعى ءبىر جايت، ول ايماقتا كونسەسسيالىق جوبالار ارقىلى وسكەمەن مەن سەمەي قالالارىنداعى كوشەلەرگە قۋات ۇنەمدەۋشى جارىق شامدارىن ورناتۋ كوزدەلىپ وتىر. ودان بولەك جىلۋ ورتالىقتارى مەن تازالاۋشى قوندىرعىلار دا وسى جوبالار ارقىلى جوندەلمەكشى. جوسپارلانعان جوبالار 100 ميلليارد تەڭگەدەن استام قاراجاتقا باعالانۋدا.
دانيال احمەتوۆ، شىعىس قازاقستان وبلىسىنىڭ اكىمى:
دەمەك، ينۆەستوردىڭ قولىندا بار قاراجات بوس جاتپايدى دەگەن ءسوز. ولار ءوز ەلدەرىندە تابا المايتىن تابىستى بىزدەن الا الادى. ءبىزدىڭ جۇمىسىمىز بەن ءبىزدىڭ مەملەكەتىمىزدىڭ ينۆەستيتسيا تارتۋىنىڭ تيىمدىلىگى وسىندا. قىتاي مەن تۇركيا ينۆەستيتسياسىنا قازاقستاندىق جابدىقتار مەن قۇرىلىسشىلاردى قوسىڭىز. وسىلايشا، ولار ءبىزدىڭ جوبالارىمىزعا قۋانا كەلىسەدى. كونسەسسيالىق تالاپتاردا تەك رەسپۋبليكا اۋماعىنداعى ونىمدەردى عانا پايدالانۋ قاجەتتىگى ايتىلعان.
«استانا» تەلە ارناسى