قىزىلوردادا كۇرىش جيناۋ ناۋقانى قىزۋ جۇرگىزىلىپ جاتىر

  قىزىلوردا. قازاقپارات - قازان ايىنىڭ باسىندا ەگىس ناۋقانىنىڭ اياقتالۋىنا وراي «التىن كۇز» مەرەكەسى وتەدى. اۋىل شارۋاشىلىعى ونىمدەرىنىڭ جارمەڭكەسى ۇيىمداستىرىلىپ، قالالىق يپپودروم  (ات سپورتىنا ارنالعان الاڭ) سالتاناتتى تۇردە اشىلماق.

 بۇل تۋرالى كەشە وبلىس اكىمى قىرىمبەك كوشەربايەۆتىڭ توراعالىمەن وتكەن اپپارات ماجىلىسىندە ايتىلدى.

 جيىندا وبلىستىق اۋىل شارۋاشىلىعى باسقارماسى باسشىسىنىڭ مىندەتىن اتقارۋشى تالعات بەكىشيەۆ ەگىن جيناۋ ناۋقانى بارىسى تۋرالى بايانداما جاسادى.

 بيىل وبلىستا 163,7 مىڭ گەكتارعا ەگىس ەگىلدى. سونىڭ 83,9 مىڭ گەكتارى نەگىزگى داقىل - كۇرىشكە تيەسىلى. قازىرگى تاڭدا شارۋا قوجالىقتارى كۇزدىك جانە جازدىق بيداي، ارپا داقىلىن جيناۋدى اياقتادى. ال كۇرىش جيناۋ جۇمىستارى قىزۋ جۇرگىزىلۋدە. بۇگىنگى كۇنگە دەيىن بارلىعى  12360 گ ا كۇرىش ورىلىپ، 6391 گ ا باستىرىلدى. ورتا ءونىم گەكتارىنا 41,2 سەنتنەردەن كەلەدى. سالا ماماندارى ەگىن جيناۋ جۇمىستارى قازان ايىنا دەيىن اياقتالاتىندىعىن ايتتى.

جانار- جاعارمايدان ماسەلە جوق. شارۋاشىلىقتاردىڭ قولىندا بارلىق قاجەتتى 16 مىڭ توننا ديزەل وتىنىنىڭ 11,5 مىڭ تونناسى (72,2 پايىز) ، 3,2 مىڭ توننا بەنزيننىڭ 2,3 مىڭ تونناسى (72,2 پايىز) بار. قالعان قاجەتتىلىكتەردى ارنايى بەلگىلەنگەن وپەراتورلار ۋاقىتىندا جەتكىزىپ وتىرادى.