عايبات ءسوز ايتپاۋ ءۇشىن مىنا ارەكەتتەردى جاساڭىز

استانا. قازاقپارات - ادام الەۋمەتتىك ورتادا ءومىر سۇرەدى. سوندىقتان كۇن سايىن ءار ءتۇرلى ادامدارمەن قارىم- قاتىناس جاسايدى.

كەيدە بىرەۋلەرگە قاتتى سويلەپ، بىرەۋلەر تۋرالى عايبات ايتقان كەزدەر بولىپ تۇرادى.

مىنا ءبىر حاديستە پايعامبارىمىز (س. ع. س. ): «قيامەت كۇنى ىستەگەن ىستەرىڭ مەن جۇمىستارىڭ جازىلعان امال داپتەرىڭ الدىڭا كەلەدى. الگىنى وقىپ، پەندە: «ءيا، راببىم، مەن ناماز وقىپ ەدىم، ورازا تۇتىپ، قۇلشىلىق ەتكەن ەدىم. ساداقا، زەكەت بەرگەن ەدىم. ول جاقسىلىقتارىمنىڭ ءبارى قايدا؟»، -  دەيدى. سوندا اللا: «ءيا، سەن قۇلشىلىق ەتىپ، كوپ ساۋاپ العان ەدىڭ. ءبىراق، ادامداردىڭ سىرتىنان عايباتتاپ، وسەك ايتقانىڭ ءۇشىن بار جاقسىلىقتارىڭ ءوشىرىلدى. ال سەنىڭ ساۋاپتارىڭنىڭ ءبارىن سول ءوزىڭ عايبات ەتكەن جانعا جازدىردىم»، -  دەيدى»، -  دەگەن.

ادام وسەك ايتۋ، بىرەۋدى جامانداۋ ۇلكەن كۇنا ەكەنىن ءبىلىپ تۇرسا دا، ول ارەكەتكە ەرىكسىز بارىپ قالادى. پەندەنىڭ ءالسىز تۇستارىنىڭ ءبىرى دە وسى.

سوندىقتان وسى كەمشىلىكتەن ارىلىپ، عايبات ايتپاۋ ءۇشىن مىنا ارەكەتتەردى جاساڭىز، سوندا ءسىز ءوزىڭىزدى كۇنا جاساۋدان ساقتاي الاسىز:

1. وزگەلەرمەن اڭگىمە بارىسىندا ارالارىڭىزدا جوق بىرەۋدى تالقىلاۋ باستالسا، دەرەۋ تاقىرىپتى وزگە جاققا بۇرۋعا تىرىسىڭىز نەمەسە ول جەردەن تەزىرەك كەتۋگە اسىعىڭىز.

 2. سىزگە ۇنامايتىن ءبىر ادام تۋرالى باسقالارعا شاعىم جاساماڭىز. ول ادام سىزگە ۇناماعانى ءۇشىن كىنالى ەمەس.

 3. ءبىر ادام تۋرالى ايتقاننىڭ وزىندە تەك جاقسى جاعىن ايتىڭىز.

 4. سىزگە بىرەۋدى جامانداپ كەلەتىن ادام ءسىزدى دە باسقاعا جامانداپ باراتىنىن ۇمىتپاڭىز.

 5. كەي جاعدايدا بىرەۋگە قاتتى رەنجىپ، سەزىمدەرىڭىزدى سىرتقا شىعارعىڭىز كەلەدى. ونداي كەزدە مۇڭ- شەرىڭىزدى كۇندەلىككە نەمەسە قاعازعا ءتۇسىرىڭىز.

 6. بىرەۋدى عايباتتاپ، وسەك ايتقان ءسىزدى ادەمى ەتپەيدى. كەرىسىنشە، وزگەلەر ءسىزدى سىيلاۋدان قالادى.

 7. الەۋمەتتىك جەلىلەردە دە وسەك ايتۋ كۇنا.

 8. سوسىن، جاعدايدى سىرتتان باقىلاپ كورىڭىز. ءسىزدىڭ دە سىرتىڭىزدان عايبات ءسوز ەرسە، قانداي كۇيدە بولار ەدىڭىز؟

mazhab.kz