پاۆلوداردا «ءماشھۇر ءجۇسىپ كوپەي ۇلى» دەرەكتى فيلمىنىڭ تۇساۋكەسەرى ءوتتى
بۇل تۋرالى دەرەكتى فيلمنىڭ رەجيسسەرى، قازاقستان جازۋشىلار وداعى سىيلىعىنىڭ يەگەرى، حالىقارالىق «تۇركى الەمى» تەلەستۋدياسىنىڭ باس ديرەكتورى دوقتىرحان تۇرلىبەك حابارلادى. دەرەكتى فيلمنىڭ رەجيسسەرى دوقتىرحان تۇرلىبەكتىڭ ايتۋىنشا، تۋىندى شەت ەلدە تۇسىرىلگەن.
« ءماشھۇر ءجۇسىپ بابامىزدىڭ عۇمىرى جايلى تۋىندى تاشكەنتتە ءتۇسىرىلدى. 40 مينۋتتىق بەينەباياندى تۇسىرۋگە بەس ميلليونعا جۋىق قاراجات كەتتى. قاراجاتاتتىڭ ءبىر بولىگىن زيالى قاۋىم وكىلدەرى مەن ۇرپاقتارى بولسە، ال نەگىزگى بولىگىن ءوز مويىنىمىزبەن كوتەردىك»، - دەدى د. تۇرلىبەك. دەرەكتى ءفيلمدى ءتۇسىرۋ جۇمىستارى ەكى جارىم جىل بۇرىن باستاۋ العان.
الايدا رەجيسسەر بۇل تۋىندىعا كوڭىلىنىڭ تولماي وتىرعانىن جەتكىزدى.
«پاۆلودار قالاسىندا دەرەكتى فيلمنىڭ تۇساۋكەسەرى بارىسىندا جاڭادان ويلار كەلدى. ءماشھۇر ءجۇسىپ بابامىزدىڭ شىعارماشىلىعى مەن ءومىرىن زەرتتەۋمەن اينالىسىپ جۇرگەن عالىم- جازۋشىلاردىڭ پىكىرىن قوسۋدى ءجون سانادىم. كەلەر جىلى دەرەكتى فيلمدى تولىقتىرۋ جۇمىستارىن باستايمىن. ناقتىراق ايتقاندا، فيلوسوفتىڭ ەڭبەك ەتكەن جەرلەرىن دە بەينەباياندا قامتۋ جۇمىستارى قاراستىرىلادى. وسى ماقساتتا ءتۇسىرىلىم ومبى، قازان قالالارىندا جالعاسىن تاپپاق»، - دەدى حالىقارالىق تەلەستۋديانىڭ باس ديرەكتورى د. تۇرلىبەك.
ءماشھۇر ءجۇسىپ كوپەي ۇلىنىڭ اۋليەلىك قىرى دا ەلگە ءمالىم. ءوز زامانىندا ءومىر ءسۇرىپ- اق بۇگىنگى كۇنى «قوي ۇستىنە بوزتورعاي جۇمىرتقالايتىن زامان بولادى» دەپ بولجام ايتقان. سونداي- اق عۇلاما» مەن ولگەن سوڭ، 40 جىلعا دەيىن دەنەم بۇزىلمايدى، ءتىرى ادام كوزى كورەدى. تەك جازدىڭ ىستىق ايلارىندا اقىرەتىمدى ايىرباستاپ وتىرىڭدار، قىستا قاجەتى جوق. سوندا كوزدەرىڭ جەتەدى»، - دەپ وسيەت ايتىپتى. اۋليەلىك قاسيەتكە يە بولعان ءماشھۇر ءجۇسىپ كوپەي ۇلى 73 جاسىندا دۇنيەدەن وتكەن.