استانادا ماماندار تازىنىڭ شاپشاڭدىعىن، توبەتتىڭ باتىلدىعىن باعالادى - فوتو
قازاقتىڭ تازىسى مەن توبەتتەرىنىڭ اسىل تۇقىمىن ساقتاۋ، ولاردى ناسيحاتتاۋ ماقساتىندا وتكىزىلەتىن وسى اۋقىمدى ءىس- شارانى «قانسونار» اڭشىلاردىڭ قوعامدىق بىرلەستىكتەرى مەن اڭشىلىق شارۋاشىلىعى سۋبەكتىلەرىنىڭ رەسپۋبليكالىق قوعامداستىعى اقمولا وبلىستىق اكىمدىگىمەن بىرلەسىپ ۇيىمداستىردى.
قازاق تازىسى مەن اسىل تۇقىمدى قازاقى توبەتتەردىڭ ءبىرىنشى رەسپۋبليكالىق كورمەسىنە قازاقستاننىڭ بارلىق وڭىرىنەن 40 تازى، 20 توبەت اكەلىنگەن.
اڭشىلىق كەزىندە تازىلار اڭدى قۋىپ ءجۇرىپ ۇستايتىندىقتان، ولار ساعاتىنا 90 ك م شاپشاڭدىقپەن جۇگىرەتىن بولعان. ادامدار تازىلاردى قويان مەن تۇلكىگە، كەيدە قاسقىرعا دا سالادى. ءبىراق قاسقىر يتتەن وكتەم كەلتىندىكتەن، يتتەردىڭ ءبارى بىردەي قاسقىرعا شابا بەرمەگەن. مۇندايدا كوبىندە «ۇيالاس» ءبورىباسار، توبەتتەر قاسقىرعا باتىل شاباتىن بولعان. سول ءۇشىن ازۋلى توبەتتەردى، كۇشتى تازىلاردى قاسقىر الۋعا ارنايى باۋليدى ەكەن.
بۇگىنگى بايقاۋدا مىنە، وسىنداي ناعىز توبەتتەردىڭ باتىلدىعىن قاسقىرعا سالىپ سىناسا، تازىلاردىڭ جۇيرىكتىگىن 250 مەترگە جۇگىرتكىزىپ باعالادى.
«ءبىز بيىلعى جىلى قازاق حاندىعىنىڭ 550 جىلدىعىنا ارنالعان ۇلكەن ءدۇبىرلى تويدى اتاپ ءوتىپ جاتىرمىز. تويدىڭ قامتىيتىن اۋقىمى دا اناعۇرلىم كەڭ. قازاق ۇلتىنىڭ وتكەن تاريحى مەن ءداستۇرلى مادەنيەتىندە ورنى بار بارلىق قۇندىلىقتارىمىزدى وسى تويدا كورسەتۋىمىز كەرەك. مىنە، سولاردىڭ ءبىرى قازاقتىڭ تۇرمىس سالتىندا كورىنىس تاپقان، اڭشىلىقتا، مال باعۋدا كەڭىنەن پايدالانعان جۇيىرىك، العىر تازىلار مەن قوتاندى كۇزەتەتىن ءداۋ توبەتتەردىڭ ورنى ەرەكشە دەپ ويلايمىن. بۇرىنعى حاندارىمىز دا ساياتشىلىققا وسى تازىلاردى ەرتىپ شىققان عوي. بۇگىنگى كۇنى سول اتالارىمىز جەتى قازىنانىڭ بىرىنە جاتقىزعان قازاقى يتتەردىڭ سانىنىڭ سيرەپ بارا جاتۋى، بارىنىڭ ءوزى باسقا تۇقىمداعى يتتەرمەن بۋدانداسىپ قانىن بۇزىپ، وزگەرىپ جاتۋى ءبىزدى ويلاندىرۋى كەرەك. الداعى ۋاقىتتاردا بۇل يتتەردىڭ سانىن مولايتىپ، تازا قاندى توبەتتەر مەن تازىلاردى انىقتاپ شىعۋ ءۇشىن وبىلىستاردا وسى سياقتى بايقاۋلاردى جالعاستى ۇيىمداستىراتىن بولامىز»، - دەيدى «قانسونار» اڭشىلاردىڭ قوعامدىق بىرلەستىگىنىڭ باسقارما ءتوراعاسى ورالباي ابدىكارىموۆ.
باقىتجول كاكەش