جارالانعان ابىلاي حاندى قۇتقارعان جاۋعاش باتىر

استانا. قازاقپارات - جاۋعاش، جاۋعاشتى قىرباس ۇلى - قازاق باتىرى، ابىلاي حاننىڭ اسكەري قولباسشىسى، ەلشى.

1733 -جىلى ىلە الاتاۋى ەتەگىندە دۇنيەگە كەلىپ، مەركى جەرىندە قايتىس بولعان. جاۋعاش باتىر ۇلى ءجۇزدىڭ دۋلات تايپاسى بوتپاي رۋىنان شىققان. اكەسى قىرباس ХVIII عاسىردىڭ 1-جارتىسىندا جوڭعارلارمەن بولعان شايقاستارعا قاتىسقان، اڭىراقاي شايقاسىندا بوتپاي قولىن باسقارعان سامەن باتىر اسكەرىندە مىڭباسى بولعان. جاۋعاش 19 جاسىندا اتقا قونىپ، قاسىنداعى قارپىق، مايلىباي سياقتى سەرىكتەرىمەن الاتاۋدان ارقاعا بارىپ، ابىلاي حاننىڭ وردا ساربازدارىنىڭ قاتارىنا قوسىلعان. جاۋعاش ابىلاي حاننىڭ تاپسىرمالارىن تياناقتى ورىنداپ، سەنىمدى سەرىكتەرىنىڭ بىرىنە اينالعان. 1754-1756 -جىلدارى ابىلاي حاننىڭ ارنايى اسكەري قولىن باسقارعان.

 1756 -جىلى قىتايلارمەن بولعان شايقاستا ابىلاي حان جارالانعاندا، ۇرىس دالاسىنان حاندى امان الىپ شىعىپ، قۇتقارىپ قالعان. بۇحار جىراۋ جىرلارىندا ابىلاي حان «ىزدەسەم دە تابىلماس، جاۋعاشجان، سەندەي قۇباشا ۇل» دەپ ماداقتاعان جاۋعاش باتىر وسى. ول قىتايمەن اراداعى قاتىناستاردى رەتتەۋگە قاتىسقان ەلشى دە بولعان. 1771-1774 -جىلدارى قىرعىزدارمەن بولعان قاقتىعىستاردىڭ مامىلەگەرلىكپەن اياقتالۋىنا ات سالىسقان.

ابىلاي حان ءومىرىنىڭ سوڭىنا دەيىن جانىندا بولىپ، اينىمايتىن تىرەگى سانالعان جاۋعاش باتىرعا جوڭعارلارعا قارسى سوعىستاردا كوتەرگەن قاسيەتتى جەڭىس تۋىن امانات ەتىپ تاپسىرعان. سول تۋ باتىردىڭ ۇرپاقتارىنىڭ قولىندا كۇنى بۇگىنگە دەيىن ساقتاۋلى. دەنەسى تۇركىستانداعى قوجا احمەت ياسساۋي كەسەنەسىنىڭ ىشىندە، ابىلاي حاننىڭ قاسىنا جەرلەنگەن.

«ماسساگەت»