مۇندا قازىرگى زاماننىڭ ايگىلى ارحەولوگتارىنىڭ ءبىرى فرانك گودديو العاش رەت مىسىرداعى ءابۋ-كير شىعاناعىنىڭ تۇبىنەن تابىلعان ەكسپوناتتارىن قويادى. ۇيىمداستىرۋشىلار 5 ايعا سوزىلاتىن كورمەگە جارتى ميلليونعا دەيىن قوناق كەلەدى دەپ كۇتۋدە.
پاريجدەگى اراب الەمى ينستيتۋتىنىڭ كىرەبەرىسىندە قۇرىلىس جۇمىستارى قىزۋ ءجۇرىپ جاتىر. مۇندا قىزعىلت گرانيتتەن جاسالعان الىپ 3 ءمۇسىن ورناتىلۋى ءتيىس. ءبىزدىڭ زامانىمىزعا دەيىن 300-جىلعى جادىگەرلەر بۇعان دەيىن عيباداتحاناعا كىرەبەرىستە تۇرسا، ەندى كوپشىلىكتىڭ كوزايىمىنا اينالماق.
جاك لانگ، اراب الەمى ينستيتۋتىنىڭ پرەزيدەنتى:
- ارحەولوگتاردىڭ ءابۋ- كير شىعاناعى مەن الەكساندريادا جۇرگىزگەن جۇمىستاردىڭ ناتيجەسىندە ەكى كونە شاھاردىڭ بولعانى انىقتالدى. ولاردى تسۋنامي مەن جەر سىلكىنىسى سالدارىنان سۋ باسىپ قالعان. ءدال وسى قالالاردا جىل سايىن وسيريس قۇدايىنىڭ تىرىلۋىنە قاتىستى 21 كۇنگە سوزىلاتىن سالتاناتتى شارالار وتكىزىلىپ وتىرعان.
اتالمىش شاھارلار سۋ استىندا قالعانىمەن، وتە جاقسى ساقتالعان. ماسەلەن، ارحەولوگتار مۇندا ءتۇرلى عيماراتتارمەن قاتار ءتۇرلى بۇيىمدار، اشەكەيلەر، مۇسىندەر مەن تاسقا قاشالعان جازۋلاردى دا تاپقان ەكەن. ازىرگە كورمە زالى شەبەرحاناعا كوبىرەك ۇقسايدى. 300 گە جۋىق ەكسپوناتتىڭ 250 ى كەلۋشىلەرگە العاش رەت كورسەتىلمەك. بۇل فرانك گودديونىڭ 20 جىلدىق ەڭبەگىنىڭ جەمىسى. بۇگىندە ارحەولوگيا سالاسىنداعى جاڭالىقتار سانى بويىنشا وعان جەتەر جان جوق. جانە سۋ استىنداعى ەجەلى مىسىر قالالارى ونىڭ تاريح الدىندا سىڭىرگەن ەڭبەگىنىڭ تەك ءبىر بولىگى عانا.
www.24.kz