نۇرلان ابدۋللين مەن ساكەن مايعازيەۆ «قازاق ەلى» مۋلتفيلىمىندە «قاراقشىلار» ءانىن ورىندايدى

استانا. قازاقپارات - الماتىدا 7 -قىركۇيەك كۇنى «ساق» كينوستۋدياسىنىڭ «قازاق ەلى» اتتى تولىقمەترلى انيماتسيالىق فيلمىنىڭ جۇمىس بارىسى تۋرالى باسپا ءسوز ءماسليحاتىندا مالىمدەمە جاسايدى.

فيلم ق ر مادەنيەت جانە سپورت مينيسترلىگىنىڭ تاپسىرىسى بويىنشا جاسالۋدا. باسپا ءسوز ءماسليحاتىندا فيلمنەن ۇزىندىلەر كورسەتىلەتىن بولادى. «ساق» كينوستۋدياسى قالىڭ جۇرتشىلىققا «قوشقار مەن تەكە»، «مومىن مەن قاراقشىلار»، «تولاعاي»، «مايماق قاز»، «مۇڭلىق - زارلىق»، «ساپا وليمپياداسى»، «قاناتتى بارىس تۋرالى اڭىز»، «قازاقستان برەندى»، اتتى مۋلتفيلمدەرىمەن جانە «قازاقستان» ۇلتتىق تەلەارناسىنىڭ «ەڭ ۇزدىك جوبا» نوميناتسياسىن جەڭىپ العان بالالارعا ارنالعان «تومپاق تەلەحيكاياسى» سەريالى ارقىلى كەڭىنەن تانىلعان.

فيلمدەگى وقيعا جەلىسى كەرەي مەن جانىبەكتىڭ بالا كەزدەرىنەن باستاپ ەسەيىپ، ەر جەتىپ، ەل باسقارىپ، قازاق حاندىعىن قۇرعانعا دەيىنگى ارالىقتى قامتيدى. فيلمنىڭ ماقساتى بالالاردىڭ ءوز تاريحىن تۇسىنۋىنە، كەرەي مەن جانىبەكتەي باتىرلاردىڭ قازاق حاندىعىن قالاي قۇرعانىن ءبىلىپ، سولارعا ەلىكتەۋگە، ءوز ەلىنىڭ پاتريوتى بولىپ وسۋلەرىنە جول اشۋ.

فيلم جەلىسىندە جانىبەك پەن كەرەيدىڭ ۇستازى بولعان قارت باتىردىڭ ولارعا ساداق اتۋ، قىلىشتاسۋ، اتپەن شابۋ، سول سەكىلدى جاۋىنگەرلىك ونەردىڭ ءتۇرلى تاسىلدەرىن ۇيرەتۋى كەڭىنەن كورسەتىلەدى. كەيىن ەل باسقارۋدا ءبىلىمنىڭ دە ماڭىزى زور ەكەنىن ۇستازىنان ۇعىنعان كەرەي مەن جانىبەكتىڭ وتىرار قالاسىنا اتتانۋى، وتىرار كىتاپحاناسىن ارالاپ، عۇلاما ۇستازداردان ءتۇرلى دارىستەر الىپ، ەلگە ورالعاندا ءتۇرلى ەرلىكتەرىمەن كوزگە تۇسە باستاۋى دا قامتىلعان.

بالالاردىڭ قىزىعۋشىلىعىن ارتتىرۋ ماقساتىندا فيلمدە كەرەي مەن جانىبەكتىڭ بالا كەزدەرىندە باستارىنان وتكەن قىزىقتى وقيعالارى كورسەتىلەدى. ولاردىڭ تاي ۇيرەتەمىز دەپ ءجۇرىپ، قالاي قاراقشىلارعا تاپ بولعاندارى، قارت باتىردىڭ كومەگىمەن قاراقشىلاردى جەڭىپ شىعۋى بالالارعا ءبىر جاعىنان اباي بولۋدى مەڭزەسە، ەكىنشى جاعىنان ەزۋ تارتار بولارى ءسوزسىز. وسى ەپيزودقا ارنايى جازىلعان «قاراقشىلار» ءانىن نۇرلان ابدۋللين، ساكەن مايعازيەۆ (مۋزارت توبى) سىندى كاسىبي انشىلەرمەن قاتار نۇرجان تولەنديەۆ («الداراسپان» تەاترى)، بەرىك تۇرسىنبەكوۆتەي («شىمكەنت- شوۋ» تەاترى) ەلگە ازىلىمەن تانىلعان ازاماتتار ورىندايدى دەپ كۇتىلۋدە.

فيلم بارىسىندا قازاق جەرىنىڭ اسەم تابيعاتى، سول زامانداعى جىبەك جولى بويىندا ورنالاسقان ساۋران، وتىرار، سىعاناق سياقتى ءىرى قالالار، ءزاۋلىم حان سارايلارى كورسەتىلەدى. سونىمەن بىرگە، كىشكەنتاي كورەرمەندەرىمىز ەلوردامىز استانانىڭ بۇگىنگى كوز سۇيسىندىرەر كوركىن دە تاماشالاي الادى. فيلمنىڭ تاريحي كەڭەسشىسى - تاريح عالىمدارىنىڭ دوكتورى، پروفەسسور - جامبىل ارتىقباي (تاريح عىلىمدارىنىڭ دوكتورى، پروفەسسور). فيلمنىڭ كورسەتىلىمى جەلتوقسان ايىنداعى تاۋەلسىزدىك كۇنى قارساڭىنا جوسپارلانعان.