ءسوز سويىل ءازىل - وسپاق، سىن - سىقاق
مۇقاعالي ماقاتايەۆ ءبىر جولى اقتوبەگە بارعانىندا وبلىستىق گازەتتە قىزمەت ىستەيتىن اقىن مۇحتار قۇرماناليننىڭ بولمەسىنە كىرسە، ول كىسى جوق ەكەن دە، ءبىر جاس قىزمەتكەر وتىرسا كەرەك. - مۇحتار قايدا؟ - دەپ سۇرايدى ودان مۇقاعالي. - مۇقاڭدى رەداكتور شاقىرىپ ەدى، قازىر كەلىپ قالار، وتىرا تۇرىڭىز. مۇقاعالي ۇستەلدى ساۋساقتارىمەن شەرتكىلەپ: «مۇحتار دا مۇقا، مۇقاعالي دا مۇقا» ، - دەگەندى قايتالاپ ايتا بەرەدى. الگى جىگىت قاراپ وتىرماي: - مۇقاڭ كوپ بولعانمەن، مۇحتار بىرەۋ عوي، - دەپتى. مۇقاعالي وعان جالت قارايدى: - دۇرىس ايتاسىڭ، بالا، اتىڭ كىم ءوزىڭنىڭ؟ - قۇرال. وسى كەزدە بولمەگە باسقا ءبىر جىگىت كىرىپ كەلەدى. ول مۇقاعاليدى تانىپ، قول ۇسىنىپ، سالەم بەرەدى. - ال سەن كىمسىڭ؟ - دەپ سۇرايدى مۇقاعالي: - بولات تەمىروۆ دەگەن اقىن ءىنىڭىزبىن عوي، - دەيدى جاڭا كەلگەن جىگىت. سوندا مۇقاعالي: - وۋ، رەداكتسيالارىڭا قۇرال- سايمان، تەمىر- تەرسەك تولىپ كەتىپتى عوي، - دەگەن ەكەن.
بۇل نەنىڭ بەلگىسى
جىبەك ءامىرحانوۆا سوزگە ۇستا، قازاقى قالجىڭنىڭ دا مايىن تامىزاتىن، وتكىر ءتىلدى ۇلتىمىزدىڭ ماقتان تۇتار قىزدارىنىڭ ءبىرى. ول الماتى وبلىسى اكىمىنىڭ ورىنباسارى بولىپ جۇرگەن كەزىندە بىر قالىپتى مىنەزىمەن، ويلى ۇسىنىستارىمەن كوزگە تۇسكەن ساناۋلى ساياساتكەر قىزدارىمىزدىڭ كوشىن باستاعان بولاتىن. اسىرەسە، «قىمىزمۇرىندىق» ءراسىمى مەن «مىڭ بالا» قوزعالىستارى جىبەك ءامىرحانوۆانىڭ وزىنە عانا ءتان قولتاڭباسىن ايعاقتاعانداي. الماتىدا ءارتۇرلى دەڭگەيدەگى قابىلداۋلار، تۇساۋكەسەرلەر، شاي ىشۋلەر بولىپ جاتاتىن. استە، وسىنداي كەزدەسۋلەردە جىبەك ءامىرحان قىزى قالام ۇستاعان قاۋىممەن جۇزدەسپەي كەتپەيدى. شەراعاڭ دا سۇلۋ مۇرتىنىڭ ارجاعىنان وزىنە عانا جاراساتىن ادەمى جىميىسىمەن قالجىڭ سوزبەن قاعىسىپ قالادى. اسىرەسە، شەراعاڭ موينى جىڭىشكە بوكالعا سۋدى قۇيىپ الىپ، جىبەكتىڭ قاسىنا كەلگەندە: - كانە، جىگىتتەر، بوكالدارىڭنىڭ مىقىنىنان ۇستاپ جىبەكپەن سوعىستىرىپ ىشەلىك، - دەپ حرۋستال بوكالىن سىڭعىر ەتكىزىپ تۇيىستىرەدى. وسى كورىنىس ەكى- ءۇش مارتە قايتالاندى. شەراعاڭ تاعى ءبىر مارتە الگى قالجىڭىن قايتالاعانى سول- اق ەكەن جىبەك اپامىز جىميىپ قانا: - شەراعا، قولىڭىز مىقىننان نە جوعارى شىقپادى، نە تومەن تۇسپەدى عوي. بۇل نەنىڭ بەلگىسى، - دەپ كۇلىپ جىبەردى. شەراعاڭ وسىدان كەيىن جىبەكپەن قالجىڭداسۋدى مۇلدە قويىپتى.
ەلدىڭ پاتشاسىنا تەڭەدى
اقىن شىنبەرگەن سۇلەيمەن قىزىلوردالىق ايتىسكەر اقىن ايدوس راحمەتوۆتىڭ بەت الپەتىنە قاراپ ونى باراك وباماعا تەڭەپتى. سوندا ايدوس: - شىنبەرگەن قارسىلاسىم نە دەپ كەتتى، بىزدەردى وباما دەپ ەلەپ كەتتى. بولار ەلدىڭ بالالارى دەگەن وسى، ءبىر ەلدىڭ پاتشاسىنا تەڭەپ كەتتى، - دەگەن ەكەن.
جۇماقتىڭ كىلتى قايدا؟
استانا قالاسىندا وتكەن ءبىر ايتىستا نۇرمات مانسۇروۆ سارا توقتامىسوۆاعا ءبىزدىڭ ەلگە كەلىن بول دەيدى. ال سارا وڭتۇستىكتە كەلىن ەنەنىڭ اياعىن جۋادى دەپ كەلىن بولمايتىنىن ايتقان ەكەن. سوندا نۇرمات: - ...سەنىمەنەن قوسىلىپ مەن دە جۋام، سەن پەرزەنتتىك پەيىلدى ايادىڭ با. ساراجان- اۋ، سەن سوندا بىلمەۋشى مە ەڭ، جۇماق كىلتى انانىڭ اياعىندا، - دەپتى. كورگەن بىلگەنوۆ. استانا
«ەگەمەن قازاقستان»