«ءبىز ءاربىر ۇمبەت ءۇشىن، وزدەرىنە بەرگەن جانۋارلاردان: تۇيە، سيىر، قوي جانە ەشكىدەن، اللانىڭ عانا اتىن اتاپ، قۇربان شالۋدى بەكىتتىك. ويتكەنى، قۇدايلارىڭ - ءبىر- اق قۇداي. سوندىقتان سوعان بوي ۇسىنىڭدار! (مۇحاممەد!) ىقىلاستىلاردى قۋاندىر»
وسى اياتتىڭ اراپشا ءتۇپنۇسقاسىندا «ءباھيماتۋل ءانام» ءسوز تىركەسى اشىق- ايقىن ايتىلعان. اراپشادا «ءباھيما» ءسوزى - جانۋار، مال دەگەن ماعىنانى بىلدىرسە، ونداعى «ءانام» ءسوزى اراپشادا ءتورت مال ءتۇرىن قامتيدى. ولار: تۇيە، سيىر جانە قوي، ەشكى[2]. بۇل دەگەنىمىز، اياتتا بەكىتىلگەن مالداردان وزگە، جىلقى، تاۋىق، قاز، ۇيرەك ت. ب. حايۋاندار - قۇرباندىققا جارامسىز دەگەن ءسوز دەيدى عالىمدار. مۇندا ءمازحاب عۇلامالارى اراسىندا تالاس جوق.
ويتكەنى قۇرباندىق شالۋ - ناماز، زەكەت ىسپەتتى، اللاعا قۇلشىلىق ەتۋدىڭ ءبىر ءتۇرى. ال قۇلشىلىققا قاتىستى ۇكىمدەر كوبىنە ايات جانە حاديسپەن بەكىتىلەدى. اياتتا بىلدىرىلگەن ۇكىم ەگەر ەشبىر بولجامدى كەرەك ەتتىرمەيتىندەي اشىق- انىق كەلگەن بولسا، بۇلجىتپاي سوزبە- ءسوز ورىندالۋى ءتيىس. ودان ارتىق نەمەسە كەم ەشكىم ۇكىم بايان ەتۋىنە قۇقى جوق. جىلقى مالىنىڭ قۇرباندىققا شالىنباۋىنىڭ توركىنى وسىندا جاتىر. ەڭ دۇرىسى - اللاعا ءمالىم.
«الاش ايناسى»