باۋىرجان وسپانوۆ سپورتقا بەيىم بالالارعا ارنالعان سپورت مەكتەبىن تارتۋ ەتتى - فوتو
اۋىلدىق جەردە ورنالاسقان العاشقى جانە بىرەگەي ينتەرنات دەمەۋشىلىك قاراجات ەسەبىنەن سالىنعاندىعىن ەرەكشە اتاپ وتكەن ءجون. وعان باستاماشىلىق ەتكەن - بيزنەسمەن باۋىرجان وسپانوۆ.
جاڭا وقۋ جىلىندا بوكس، گرەك-ريم كۇرەسى، ەركىن كۇرەس، اۋىر اتلەتيكا، دزيۋدو جانە شاڭعى جارىسى سياقتى سپورت تۇرلەرى بويىنشا 10 وقۋشى ءبىلىم الا باستادى. بۇل سپورتشىلار ىرىكتەۋدىڭ ءۇش كەزەڭىنەن وتكەندەر. ولاردىڭ ىشىندە الماتى وبلىسى اۋداندارى مەن اۋىلدارىنىڭ تۋمالارى، سونداي- اق پاۆلودار، ش ق و وكىلدەرى بار. جىل سايىن وقۋشىلار سانى مەن سپورت تۇرلەرى ۇلعاياتىن بولادى.
ينتەرنات بازاسىندا سپورتتىڭ التى ءتۇرى بويىنشا مامانداندىرىلعان زالدار اشىلدى. ويىن زالى، فۋتبول الاڭى، مونشا، كىتاپحانا، اسحانا، 25 ورىندىق جاتاقحانا. سونداي-اق باپكەرلەر مەن وقىتۋشىلارعا ارنالعان ۇيلەر سالىندى. شاڭعى جولى مەن يپپودروم سالۋ جوسپاردا بار. اشىلۋ راسىمىندە باۋىرجان وسپانوۆ ينتەرناتقا جاڭا شاعىن اۆتوبۋس تابىس ەتتى، ونىمەن بالالار ءتۇرلى جارىستارعا قاتىنايتىن بولادى.
- جاڭا ينتەرنات جەتىسۋدىڭ وتە كورىكتى جەرىندە ورنالاسقان. سۇلۋلىعىن ءتىپتى شۆەيتساريامەن سالىستىرۋعا كەلمەيدى. وتاندىق سپورتتىڭ دامۋىنا وراسان ۇلەس قوسقان باۋىرجان وسپانوۆقا راحمەت. ماقساتىمىز - بولاشاق الەم جانە وليمپيادالىق ويىندار چەمپيوندارىن ءوسىرىپ شىعارۋ. ينتەرناتقا كەلگەن بالالاردىڭ تالپىنىسىنا قاراپ، ولاردىڭ كەلەشەگىنە سەنەمىن، - دەدى گرەك- ريم كۇرەسى بويىنشا وليمپيادا چەمپيونى جاقسىلىق ۇشكەمپىروۆ.
- تاسكەسكەننەن (ش ق و) ۇلدارىمدى اكەلدىم. ولار ءۇش جىلدان بەرى گرەك-ريم كۇرەسى بويىنشا ءتۇرلى جارىستارعا شىعىپ ءجۇر. ءارقايسىسىندا 20-25 مەدالدان بار. ءبىزدى كوپتەگەن ينتەرناتتار شاقىردى، لەپسىگە ىرىكتەۋ تۋرنيرىنە كەلگەندە، بىزگە وسى جەر ۇناپ قالدى. تابيعاتى دا، جاسالعان جاعدايى دا دايىندىققا وتە ىڭعايلى، - دەدى ەگىزدەر باقيار مەن دانياردىڭ اكەسى جۇماتاي اعا.