ميگرانتتار پوليتسيامەن توبەلەستى
09:45, 03 - قىركۇيەك 2015
استانا. قازاقپارات - بۋداپەشت ۆوكزالىندا ميگرانتتار مەن پوليتسيا قىزمەتكەرلەرى اراسىندا قاقتىعىس ورىن الدى.
ۆەنگريا بيلىگى پانا تابۋ ءۇشىن گەرمانيا جانە باسقا دا باتىس ەۋروپالىق ەلدەرگە اتتانباق بولعان ولارعا پويىزعا وتىرۋعا تىيىم سالعان.
پوليتسيا بىرنەشە جاس ميگرانتتى قاماۋعا الىپ، ولاردى ەلدىڭ شىعىسىندا بوسقىنداردى قابىلداۋ ورتالىقتارىنا دەيىن جەتكىزەتىن پويىزدارعا كۇشتەپ سالعان كورىنەدى، دەپ حابارلايدى BBC.
ميگرانتتار كەلەتي ۆوكزالىنىڭ ماڭىندا نارازىلىق شاراسىنا شىقتى. ولار قولدانۋعا مۇمكىندىك بەرىلمەي وتىرعان جول ءجۇرۋ قۇجاتتارىنا جۇزدەگەن ەۋرو جۇمساعاندارىن ايتىپ، شاعىمدانعان.
ۆەنگريا بيلىگى ءوز ارەكەتىن مەملەكەتتىك شەكارالاردى قورعاۋ مىندەتتەمەلەرىن ورىنداۋعا تالپىنىسىمەن تۇسىندىرۋدە.
ەۋرووداقتىڭ بارلىق ەلدەرى قول قويعان دۋبلين كەلىسىمىنە سايكەس، بوسقىندار ە و-عا كەلگەن ءبىرىنشى ەلدەن پانا تابۋ ءوتىنىشىن بىلدىرۋگە مىندەتتى بولىپ تابىلادى.