ن. نازاربايەۆ: قىتاي ساياساتى - ازيا مەن بۇكىل الەمدەگى ۇيلەسىمدىلىك كەپىلى

بەيجىڭ. قازاقپارات - مىڭداعان جىلدار بويى قىتايدىڭ بەيبىتشىلىك پەن تاتۋ كورشىلىك ساياساتى ازيا مەن بۇكىل الەمدەگى ۇيلەسىمدىلىك كەپىلى بولدى.

بۇل تۋرالى ق ك پ و ك جانىنداعى پارتيالىق مەكتەپتىڭ تىڭداۋشىلارى مەن پروفەسسورلىق- وقىتۋشىلىق قۇرامى الدىندا ءسوز سويلەگەن ق ر پرەزيدەنتى نۇرسۇلتان نازاربايەۆ ايتتى.

«مىڭداعان جىلدار بويى قىتايدىڭ بەيبىتشىلىك پەن تاتۋ كورشىلىك ساياساتى ازيا مەن جالپى بۇكىل الەمدەگى ۇيلەسىم كەپىلى بولدى. سوندىقتان دا 20- عاسىرداعى ەرەكشە قۇبىلىس - قىتايدىڭ كوتەرىلۋىن ءبىز الدىمەن ايماعىمىزدىڭ دامۋى ءۇشىن مۇمكىندىك رەتىندە قاراستىرامىز»، - دەپ اتاپ ءوتتى مەملەكەت باسشىسى.

ن. نازاربايەۆ قازاقتىڭ ماقالىن ەسكە سالدى. «ەر تۋادى ەل ءۇشىن» دەيدى قازاق دانالىعى. سوندىقتان ءسوز سويلەۋ ءۇشىن وسى سىزدەردىڭ مەكتەپتەرىڭىزدى تاڭدادىم. بۇل مەكتەپتىڭ بۇگىنگى تىڭداۋشىلارى - الداعى ۋاقىتتا قىتاي كوممۋنيستىك پارتياسىنا باعىت بەرەتىندەر. سىزدەر - قىتايلىق ارمان - ۇلتتىڭ جاڭعىرۋىن جۇزەگە اسىرۋشىسىزدار»، - دەپ اتاپ ءوتتى ەلباسى.

«قازىرگى الەم - بۇل كەڭ ءوزارا قاتىناس الەمى». قىتاي حالىق رەسپۋبليكاسىنىڭ رەفورمالار مەن اشىقتىق ساياساتى دون سياوپيننىڭ (دىڭ شياۋپيڭ - رەد.) وسى سوزدەرىنەن باستالدى. 30 جىلدا قىتاي ەكونوميكاسى 90 ەسەگە ءوستى. الەمدە مۇنداي جەتىستىككە ەشبىر ەل قول جەتكىزگەن جوق. ءوسىم قارقىنى الەمدىك ورتاشا كورسەتكىشتەردەن 2-3 ەسە ارتىق. ساياساتتاعى، ەكونوميكا مەن وزگە دە سالالارداعى تەڭدەسسىز جەتىستىكتەر سىزدەردىڭ ەلدەرىڭىزدى جاھاندىق ۇردىستەرگە اسەر ەتەتىن قارقىندى دامىپ كەلە جاتقان ورتالىقتاردىڭ ءبىرىنىڭ دەڭگەيىنە كوتەردى»، - دەدى پرەزيدەنت.

قازاقپارات انىقتاماسى: قىتاي كوممۋنيستىك پارتياسىنىڭ (ق ك پ) ورتالىق كوميتەتى (و ك) جانىنداعى پارتيالىق مەكتەپ 1933 -جىلى جەتەكشى پارتيالىق كادرلاردى دايىنداۋ ءۇشىن قۇرىلعان. 1966-1977 ج ج. مەكتەپتە وقۋ ۋاقىتشا توقتاتىلدى.

مەكتەپتە 1600 دەن استام ادام وقيدى، وقۋ ورداسى قىزمەتكەرلەرىنىڭ سانى 1100 ماماندى قۇرايدى، ولاردىڭ 600 دەن استامى - وقىتۋشىلار. ولاردى عىلىمي جانە ساراپتامالىق ماتەريالداردى دا دايىنداۋعا تارتادى.

الەمنىڭ 30 دان استام ەلىندەگى عىلىمي-زەرتتەۋ مەكەمەلەرى جانە ج و و- لارمەن بايلانىس ورناتىلدى. مەكتەپ جۇمىسىنىڭ نەگىزگى باعىتى مەملەكەتتىك قىزمەت جۇيەسىنە زاماناۋي باسقارۋ تەحنولوگيالارىن ەنگىزۋ.

1978-2014 ج ج. مەكتەپتە ق ك پ ءتۇرلى دەڭگەيىندەگى 70 مىڭنان استام جەتەكشىسى ءبىلىم الدى.

بۇگىندە پارتيالىق مەكتەپ ءبىلىم بەرەتىن ورىن عانا بولىپ قويماي، سونىمەن قاتار ق ك پ- نىڭ «اقىل ورتالىعى». مەكتەپتىڭ نەگىزگى ۇرانى - «عالامدىق دەڭگەيدە ويلا، جەرگىلىكتى دەڭگەيدە شەشىمىن تاپ».

ەسكە سالا كەتەيىك، ساپار 3 -قىركۇيەككە دەيىن جالعاسادى. بەيسەنبى كۇنى ق ر پرەزيدەنتى قىتاي حالقىنىڭ جاپون باسقىنشىلارعا قارسى كۇرەسى سوعىسىنداعى جەڭىسىنىڭ 70 جىلدىعىنا ارنالعان سالتاناتتى پارادقا قاتىسادى.