اقتوبەدە الاياق «ارۋلار» ۇستالدى

  استانا. قازاقپارات - سوڭعى كەزدەرى ەڭبەكسىز تابىس تابۋعا قۇلىقتىلار قاتارى كوبەيىپ كەتتى. وڭاي ولجاعا كەنەلۋگە بەيىمدىلەر ءتۇرلى ايلا -  شارعىعا بارىپ جۇرگەنى دە جاسىرىن ەمەس. سونىڭ ىشىندە قىز- كەلىنشەكتەردىڭ بوي كورسەتۋى بەلەڭ الىپ بارادى.

جاقىندا اقتوبەدە  قارجى پيراميداسىن قۇرعان الاياق ايەلدەرگە قاتىستى سوت وتىرىسى باستالدى. شاعىن نەسيە ۇيىمىنىڭ اتىن جامىلعان تورتەۋدىڭ ازىرگە 94 ادامدى تاقىرعا وتىرعىزىپ كەتكەنى انىقتالىپ وتىر. جابىرلەنۋشىلەردىڭ ايتۋلارىنا قاراعاندا، الاياق ايەلدەرگە الدانعانداردىڭ سانى 300 دەن اسۋى دا مۇمكىن. «اي- نۇر» شاعىن نەسيە ۇيىمىنىڭ اتىن بۇركەنگەن ايەلدەر تۇرعىندارعا 3 ميلليون تەڭگەدەن نەسيە الىپ بەرۋگە ۋادە ەتكەن. قارجىنى راسىمدەۋ ءۇشىن كول- كوسىر قۇجات دايىنداتقان. بۇل سەنىمدىلىككە كىرۋدىڭ جولى، الداۋدىڭ باسى بولسا كەرەك. كونسالتينگتىڭ قىزمەتى ءۇشىن زارداپ شەگۋشىلەردىڭ ءارقايسىسىنان 55 مىڭ تەڭگەدەن قارجى الىپ، قالتالارىنا باسقان. بۇعان قوسا الاياق ايەلدەر اقتوبەلىكتەردى جۇمىسقا ورنالاستىرماق تا بولعان كورىنەدى. اڭقاۋ اقتوبەلىكتەردىڭ سەنىمىنە كىرگەن الاياق «ارۋلار» ارزان جەر مەن پاتەر الىپ بەرۋگە دە ۋادە بەرگەن. قازىر ءىرى كولەمدە الاياقتىق جاسادى دەپ ايىپ تاعىلعان ءتورت ايەلدىڭ ەكەۋى قاماۋعا الىنسا، ەكەۋى كەپىل اقشاعا بوساتىلعان. سوت پروتسەسى جالعاسۋدا.

 ساتىبالدى ءساۋىرباي، «ەگەمەن قازاقستان» . اقتوبە وبلىسى.