سەربيا پرەزيدەنتى قازاق پارلامەنتىندە بولدى
تاراپتار قازاقستاندىق- سەربيالىق كوپقىرلى ىنتىماقتاستىقتى دامىتۋدىڭ وزەكتى ماسەلەلەرىن تالقىلادى، دەپ حابارلادى پارلامەنت ءماجىلىسىنىڭ باسپا ءسوز قىزمەتى.
ءماجىلىس سپيكەرى سەربيا قازاقستاننىڭ وڭتۇستىك- شىعىس ەۋروپاداعى كەلەشەك جانە ماڭىزدى ارىپتەستەرىنىڭ ءبىرى ەكەنىن العا تارتا كەلىپ، بۇگىندە ەكى مەملەكەت اراسىندا قالىپتاسقان سەنىمدى ءارى سىندارلى ءۇنقاتىسۋدىڭ جىل سايىن قانات جايىپ كەلە جاتقانىن اتاپ ءوتتى. وعان مارتەبەلى مەيماننىڭ ەلباسىمەن كەزدەسۋى بارىسىندا قول جەتكىزىلگەن كەلىسسوزدەر دالەل دەۋگە بولادى.
سوندىقتان، ءبىزدىڭ ەلدەرىمىز اراسىندا ىقپالداستىقتى ودان ءارى دامىتۋدىڭ، سونىڭ ىشىندە ساۋدا- ەكونوميكالىق بايلانىستى نىعايتۋدىڭ الەۋەتى زور.
ق. جاقىپوۆتىڭ ايتۋىنشا، اسىرەسە، كولىك، قۇرىلىس، اۋىل شارۋاشىلىعى، ازىق- تۇلىك ونەركاسىبى مەن تۋريزم سالالارى ەكىجاقتى قاتىناستى كەڭەيتۋ - باسىم باعىتتار بولىپ تابىلادى.
وسى رەتتە ءماجىلىس ءتوراعاسى ىسكەرلىك احۋالدى جاقسارتىپ، ينۆەستيتسيالىق تارتىمدىلىقتى ارتتىرۋ ماقساتىندا ەلىمىزدە قابىلدانىپ جاتقان زاڭداردىڭ ماڭىزدىلىعىنا توقتالدى.
جۇزدەسۋ بارىسىندا حالىقارالىق كۇن تارتىبىندەگى ماسەلەلەرگە دە ايرىقشا كوڭىل ءبولىندى. ءماجىلىس ءتوراعاسى مارتەبەلى مەيماندى قازاقستاننىڭ دۇنيەجۇزىلىك ساۋدا ۇيىمىنا ەنۋىنە قاتىستى كەلىسسوزدەردىڭ اياقتالعاندىعىنان حاباردار ەتە كەلىپ، سەربيا پرەزيدەنتىنە «ەكسپو-2017» كورمەسىن استانادا وتكىزۋ قۇقىعىنا يە بولۋعا قولداۋ كورسەتكەنى ءۇشىن ءوز العىسىن ءبىلدىردى جانە سەربيالىق كومپانيالاردى وسى كورمەگە بەلسەنە قاتىسۋعا شاقىردى.
ءوز كەزەگىندە توميسلاۆ نيكوليچ حالىقارالىق ارىپتەستىكتىڭ قاجەتتىلىگىنە توقتالا كەلىپ، 2017-2018 -جىلدارى بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە قازاقستاننىڭ كانديداتۋراسىن قولدايتىنتىعىن جەتكىزدى.
سونداي- اق ول تاۋەلسىزدىكتىڭ بار اۋىرتپالىعىن ەڭسەرگەن ءبىزدىڭ ەلىمىزدىڭ قارقىندى دامۋىنا ءتانتى بولعانىن ايتا كەلە، بارشا قازاقستاندىقتاردى اتا زاڭنىڭ 20 جىلدىق مەرەيتويىمەن قۇتتىقتادى.
جۇزدەسۋ بارىسىندا پارلامەنتارالىق بايلانىستى تەرەڭدەتۋ ماسەلەلەرى دە نازاردان تىس قالمادى.
وسى ماقساتتا پارلامەنت ماجىلىسىندە سەربيامەن ىنتىماقتاستىق جانە دوستىق توبىن قۇرۋ جوسپارلانىپ وتىر. سەربيادا بۇل توپتى قازاقستاننىڭ اتالعان ەلدەگى قۇرمەتتى كونسۋلى ميلانكا كاريچ باسقارادى.
كەزدەسۋگە ءماجىلىس دەپۋتاتتارى ۆيكتور روگاليەۆ، نۇرلان جازىلبەكوۆ، تولەش كەنجين، نادەجدا نەستەروۆا مەن سەربيالىق تاراپتىڭ ءبىرقاتار رەسمي تۇلعاسى قاتىستى.