سۋديالار «بيلەرگە تاعزىم» اتتى تاقىرىپتا ۆەلوشەرۋ وتكىزدى - فوتو

استانا. قازاقپارات - وڭتۇستىك قازاقستان وبلىستىق سوتى مەن قازاقستان سۋديالار وداعى و ق و فيليالىنىڭ ۇيىمداستىرۋىمەن «بيلەرگە تاعزىم» اتتى تاقىرىپ اياسىندا ۆەلوشەرۋ ءوتتى.

قازاقستان رەسپۋبليكاسى كونستيتۋتسياسىنىڭ 20 جىلدىعى مەرەكەسىنە ارنالعان ۆەلوشەرۋگە وڭتۇستىك قازاقستان وبلىستىق سوتىنىڭ ءتوراعاسى ن. ءشارىپوۆ باستاعان 40 سۋديا قاتىستى.

ۆەلوشەرۋ الدىندا قاتىسۋشىلاردىڭ اتىنان وبلىستىق سوتتىڭ ءتوراعاسى نۇرسەرىك ءشارىپوۆ ءسوز سويلەدى.

«وسى جىلى بىرنەشە مەرەيتويدى: قازاق حاندىعىنىڭ 550 جىلدىعىن، ۇلى وتان سوعىسىنداعى جەڭىستىڭ 70 جىلدىعىن، قازاقستان حالقى اسسامبلەياسى مەن كونستيتۋتسيانىڭ 20 جىلدىعىن اتاپ وتۋدەمىز. جىل باسىنان بەرى وڭتۇستىك قازاقستان وبلىستىق سوتىنىڭ ۇجىمى دا ايتۋلى مەرەكەلەرگە ارنالعان يگى ءىس- شارالاردى ۇيىمداستىرىپ، وتكىزۋدە. بۇگىن ءبىز «ءۇش بي» ەسكەرتكىشىنىڭ جانىنان باستاپ، 40 شاقىرىم جول ءجۇرىپ، ورداباسى تاۋىنداعى «بىرلىك» مونۋمەنتىنە بارعالى وتىرمىز. بۇل يگى شارانىڭ ماقساتى، بىرلىكتىڭ باستاۋى بولعان ورداباسى تاۋىنىڭ مارتەبەسىن كوتەرۋ» - دەدى ن. ءشارىپوۆ.

وسىدان كەيىن وڭتۇستىك قازاقستان وبلىسى اكىمىنىڭ ورىنباسارى ە. ايتاحانوۆ پەن وبلىستىق سپورت سالاسى ارداگەرلەرى كەڭەسىنىڭ ءتوراعاسى ا. اسقار قۇتتىقتاۋ ءسوز سويلەپ، ءساتتى ساپار تىلەدى.

تۇسكە تاياۋ سۋديالار رەسپۋبليكالىق «ورداباسى» ۇلتتىق تاريحي- مادەني قورىعىنداعى مارەگە جەتتى. ولاردى ورداباسى اۋدانىنىڭ باسشىلارى مەن سپورت قايراتكەرلەرى جانە اۋىل تۇرعىندارى سالتاناتتى تۇردە قارسى الىپ، «نۇر وتان» پارتياسىنىڭ ورداباسى اۋداندىق فيليالىنىڭ ءتوراعاسى ج. بوستاندىق ۆەلوشەرۋگە قاتىسۋشىلاردى قۇتتىقتاپ، ءسوز سويلەدى.

ورداباسى اۋدانىنىڭ اكىمى س. ساپاربايەۆ، وبلىستىق سوتتىڭ سۋدياسى ا. ەلشىبايەۆ جانە اۋداننىڭ «قۇرمەتتى ازاماتى» ، ەڭبەك ارداگەرى ر. بيتۋعانوۆ ۆەلوشەرۋگە قاتىسۋشىلارعا العىستارىن ءبىلدىردى.

ن. ءشارىپوۆ قاتىسۋشىلاردى ۆەلوشەرۋدىڭ ءساتتى اياقتالۋىمەن قۇتتىقتاپ، وسىنداي ءىس- شارالاردىڭ جاستارعا بەرەر تاربيەلىك ءمانى زور ەكەنىن اتاپ ءوتتى.