قازاق مەملەكەتتىگىنىڭ تاريحي كەپىلى بولعان كىتاپ جارىق كوردى - فوتو

 استانا. قازاقپارات - بۇگىن ق ر ۇلتتىق كىتاپحاناسىندا ماحمۇت حايدار ءدۋلاتيدىڭ «تاريح- ي راشيدي» جانە ءىلياس ەسەنبەرليننىڭ «كوشپەندىلەر» كىتاپتارىنىڭ جاڭا باسىلىمدارىنىڭ تۇساۋكەسەرى ءوتتى.

 «بۇگىن ءبىز قازاقتىڭ، قازاق حاندىعىنىڭ بىردەن- ءبىر جانە جالعىز دەرەككوزى ماحمۇت حايدار دۋلاتيدىڭ «تاريح- ي راشيدي» كىتابىنىڭ تۇساۋكەسەرىنە كەلىپ وتىرمىز. بۇل كىتاپتى ءتۇپنۇسقادان اۋدارعان يران ءتىلىنىڭ مامانى يسلام جەمەنەي. بۇل كىتاپتىڭ اۋدارىلۋى ءبىزدىڭ قازاق مەملەكەتتىگىمىزدىڭ، قازاق حاندىعىنىڭ ناقتى تاريحي كەپىلى بولىپ تابىلادى» ، - دەدى كىتاپتاردىڭ تانىستىرىلىم شاراسىندا «وتىرار» كىتاپحاناسىنىڭ ديرەكتورى تۇرسىن جۇرتباي.

 ونىڭ اتاپ وتۋىنشە، قازاق مەملەكەتىنىڭ، ياعني، ءبىزدىڭ ۇلتتىق يدەيامىزدىڭ ەكىنشى رەت ويانۋىنا تۇرتكى بولىپ، وسى تاۋەلسىزدىك يدەيامىزدىڭ نەگىزىن قالاعان ەكىنشى ادام - قازاقتىڭ ۇلى جازۋشىسى ءىلياس ەسەنبەرلين.

 «اۋەزوۆتەن كەيىنگى ەسەنبەرليندەي الاش يدەياسىنا كەپىل بولعان جانە قازاقتىڭ ۇلتتىق ومىرلىك يدەياسىن مۇراتىنا اينالدىرعان جازۋشى تاريحي تۇرعىدا جوق دەۋگە بولادى. قالاي جازسىن، ولاي جازسىن. سول يدەيانى جۇزەگە اسىردى. ال قازاق مەملەكەتتىگىنىڭ قۇرىلعانىنا 550 جىل، ءى. ەسەنبەرليننىڭ دە تۋعانىنا 100 جىل تولۋىنا وراي بۇل كىتاپتاردىڭ ءبىر مەزەتتە جارىققا شىعۋى ۇلى سايكەستىك دەپ ويلايمىن» ، - دەد ول.

ماحمۇت حايدار ءدۋلاتيدىڭ «تاريح- ي راشيدي» كىتابى يران تىلىنەن اۋدارىلىپ، قازاق، ورىس جانە اعىلشىن تىلدەرىندە 7 مىڭ دانامەن جارىققا شىعارىلعان. ءىلياس ەسەنبەرليننىڭ «كوشپەندىلەر» تريلوگياسى قازاق تىلىندە 2 مىڭ، ورىس تىلىندە 2 مىڭ جانە اعىلشىن تىلىندە 2 مىڭ دانامەن جارىق كوردى.