ك. ءماسىموۆ: ۇكىمەتتىڭ اقپاراتتىق ساياساتىنا وزگەرتۋ ەنگىزىلەدى
بۇل تۋرالى ق ر پرەزيدەنتى جانىنداعى ورتالىق كوممۋنيكاتسيالار قىزمەتىندەگى بريفينگتە ەلىمىزدىڭ پرەمەر-ءمينيسترى كارىم ءماسىموۆ ءمالىم ەتتى.
«ۇكىمەتتىڭ اقپاراتتىق ساياساتىنا تۇزەتۋ ەنگىزىلەتىندىگى ءسوزسىز. ازماتتار مەملەكەتتىك ورگانداردىڭ نەمەن اينالىساتىندىعىن بىلۋگە قۇقىلى ءارى، ءتيىس تە. ءبىز قانداي دا ءبىر ماسەلەدە بۇرمالاۋشىلىق، قوسارلانعان پىكىر بولماۋى ءۇشىن اقپاراتتى جەدەل جەتكىزۋمىز قاجەت»، - دەپ اتاپ ءوتتى ۇكىمەت باسشىسى ب ا ق وكىلدەرىنىڭ ساۋالىنا وراي.
ونىڭ سوزىنە قاراعاندا، ۇكىمەتتىڭ وتىرىستارىن ونلاين رەجىمدە تاراتۋ جاعدايدان شىعۋدىڭ جولى ەمەس.
«ءبىز مۇنى قانداي نىساندا جاسايتىندىعىمىزدى اقىلداسامىز. مەنىڭشە، وتىرىستى تەك قانا ترانسلاتسيالاۋ بۇل جاعدايدان شىعۋ جولى ەمەس. دەگەنمەن، دۇرىس ءارى، ناقتى اقپاراتتى جەتكىزۋدى قامتاماسىز ەتەتىن بولامىز. ءبىز بۇل جۇمىستاردى جۇرگىزەمىز ءارى اقپاراتتى قالاي جەتكىزۋ ءتاسىلىن تابامىز»، - دەدى ك. ءماسىموۆ.
اۆتور: مارلان جيەمباي