الماتى- ىستىقكول اۆتوموبيل جولىنىڭ ەڭ قولايلى باعىتى انىقتالدى

استانا. قازاقپارات - «الماتى- ىستىقكول» اۆتوموبيل جولىنىڭ ەڭ قولايلى باعىتى انىقتالدى، «الماتى- ۇزىناعاش- قاستەك- قاراساي باتىر- ىستىقكول» باعىتى بويىنشا جۇرەتىن بولادى.

 قازاقستان رەسپۋبليكاسىنىڭ پرەزيدەنتى ءوزىنىڭ قىرعىزستان رەسپۋبليكاسىنا بارعان ءىس- ساپارى بارىسىندا، «الماتى- ىستىقكول» اۆتوموبيل جولىنىڭ قۇرىلىسى جونىندە شەشىم قابىلداعان بولاتىن.

 اتالعان تاپسىرمانى ورىنداۋ اياسىندا، «ق ت ج» ۇ ك» ا ق پرەزيدەنتى ا. مامين قىرعىزستان رەسپۋبليكاسى كولىك جانە كوممۋنيكاتسيا ءمينيسترى ا. مالابايەۆپەن كەزدەسۋ وتكىزدى. ونىڭ ناتيجەسىندە، اتالعان جوبانى جۇزەگە اسىرۋعا ارنالعان بىرلەسكەن ءىس- شارالار جوسپارى ازىرلەندى. «قازاۆتوجول» ۇك» اق، قىرعىزستان رەسپۋبليكاسىنىڭ كولىك جانە كوممۋنيكاتسيا مينيسترلىگى جانە جوبالاۋ ۇيىمدارى وكىلدەرىنىڭ قاتىسۋىمەن ەكىجاقتى جۇمىس توبى قۇرىلىپ، بولاشاق تاس جولعا العاش تەكسەرۋ جۇرگىزىلدى. تەكسەرۋ قورىتىندىسى بويىنشا باعىتتىڭ ەڭ قولايلى جولى انىقتالدى، ول «الماتى- ۇزىناعاش- قاستەك- قاراساي باتىر- ىستىقكول» باعىتى بويىنشا جۇرەتىن بولادى.

قازاقستان اۋماعى بويىنشا ۇزىناعاشتان قاستەك اۋىلىنا دەيىنگى 42 شاقىرىمدى قۇرايتىن بۇرىن بولعان جولدى قايتا جوندەۋدەن وتكىزۋ جوسپارلانعان. بۇدان ءارى ۇزىندىعى 47 شاقىرىم بولاتىن جاڭا جول قۇرىلىسى قاجەت.

 جوسپارلانعان جول تەڭىزدەن  2640 مەتر جوعارى ورنالاسقان، توڭىرەك بەدەرى قيىن، سەرپانتين بويىنشا شۇعىل وردەن وتەتىن جاڭا قاستەك اسۋى ارقىلى وتەتىن بولادى. اسۋدان ءجۇرىپ وتكەننەن كەيىن باعىت ەڭبەك جانە قاراساي باتىر (بۇرىڭعى ميحايلوۆكا اۋىلى) شەكارالىق اۋىلدارى اراسىمەن وتەتىن بولادى. ول جەرلەردە 5 مىڭعا جۋىق ادام تۇرادى.

 تاۋ جولى بويىندا جولدى 18 رەت كەسىپ وتەتىن بۇلاق اعىپ جاتقاندىعىن ايتا كەتكەن ءجون. بۇل جوبانى جۇزەگە اسىرۋ بارىسىندا، جەردىڭ بەدەرىندە كوپتەگەن جارتاستار بولعاندىقتان، بۇرعىلاپ جارۋ جۇمىستارىن اتقارۋ جانە تىرەپ تۇراتىن دۋالداردى ورناتۋ قاجەت بولادى.

 قىرعىزستان تاراپىنا دا سونداي- اق، 1 شاقىرىم جول جانە شۋ وزەنى ارقىلى كوپىر سالۋ قاجەت.

 جالپى العاندا، الماتى- ىستىقكول جاڭا باعىتى بۇرىن بولعان 480 شاقىرىم جولدىڭ ورنىنا 280 شاقىرىمدى قۇرايتىن بولادى. اتالعان باعىتتى تاڭداۋ ەڭبەك جانە قاراساي باتىر اۋىلدارىن الماتى قالاسىمەن بايلانىستىرۋعا مۇمكىندىك بەرەدى، ول اتالعان ءوڭىردىڭ دامۋىنا وڭ ىقپال ەتەدى.

 «الماتى- ىستىقكول» جاڭا جول قۇرىلىسى تۋريزمنىڭ وركەندەۋىنە اسەر ەتەدى، ەلدەر اراسىنداعى ترانزيت الەۋەتىن ارتتىرۋعا سەپتىگىن تيگىزەدى، سونداي- اق، جاعىمدى الەۋمەتتىك- ەكونوميكالىق كۇش بەرىپ، اتالعان باعىتتىڭ بويىندا ورنالاسقان ەلدى- مەكەندەردىڭ دامۋىنا مۋلتيپليكاتيۆتىك اسەر بەرەدى.

بۇدان بۇرىن حابارلاعانىمىزداي، اعىمداعى جىلدىڭ 12 - تامىزىندا ەۋرازيالىق ەكونوميكالىق وداعى تۋرالى شارتقا قىرعىز رەسپۋبليكاسىنىڭ قوسىلعاندىعى تۋرالى شارت كۇشىنە ەندى. قىرعىزستان ەندى ارمەنيا، بەلارۋس، قازاقستان جانە رەسەي سياقتى وداقتىڭ تولىققاندى مۇشەسى بولدى.