توپقا «قيىن بالالار» دا قوسىلدى

استانا. قازاقپارات - الماتى وبلىسى ورتالىعىنداعى مەكتەپتەردىڭ وقۋشىلارى ءۇشىن بيىلعى جاز كوڭىلدى وتۋدە.

 قالا باسشىلىعى مەن ءبىلىم ءبولىمى جەتەكشىلىگىنىڭ ۇيىمداستىرۋىمەن تولىق ەمەس جانە كوپبالالى وتباسىلاردىڭ جەتكىنشەكتەرى مەن اتا- انانىڭ قامقورلىعىنسىز قالعان بالالاردىڭ بالقاش كولىندە سۋعا ءتۇسىپ، دەمالىپ قايتۋى جۇزەگە اسىرىلۋدا.

بۇعان دەيىن 150 بالادان جاساقتالعان ەكى توپ كەزەك- كەزەگىمەن كوگىلدىر كولدىڭ ايدىنىندا ءجۇزىپ، جاعالاۋىندا اسىر سالىپ، جاڭا وقۋ جىلىندا تەك ۇزدىك وقۋعا جىگەرلەنىپ كەلسە، كۇنى كەشە 150 بالادان قۇرالعان كەزەكتى ءۇشىنشى توپ بالقاشتى بەتكە الىپ ءجۇرىپ كەتتى. وسىعان دەيىن جيناقتاعان تاجىريبەنى ەسكەرگەن ۇيىمداستىرۋشىلار ءۇشىنشى توپتىڭ تەڭ جارتىسىن جاعىمسىز مىنەز- قۇلىقتارىنا بايلانىستى مەكتەپتەگى ارنايى ەسەپكە الىنعان «قيىن بالالاردان» جاساقتادى.

مۇنداعى ماقسات - ولاردىڭ قاتار قۇربىلارىمەن بىرگە ءجۇرىپ، بىرگە دەمالۋ ارقىلى تۇزەلۋىنە ىقپال ەتۋ.

 -  ەسەپتە تۇرعان وقۋشىلار قۇرداستارىمەن بىرگە دەمالۋ بارىسىندا وزدەرىن ەشكىمنىڭ ءبولىپ- جارمايتىنىن سەزىنۋ ارقىلى جاڭا وقۋ جىلىندا بۇرىنعى جاعىمسىز قىلىقتارىنان باس تارتارى انىق. دەگەنمەن باقىلاۋ كۇشەيتىلە تۇسەدى، -  دەيدى قالالىق ءبىلىم ءبولىمىنىڭ باسشىسى بولات تۇرىسبەكوۆ.

بالقاش كولىندە دەمالاتىن بالالاردىڭ جولداعى جانە سۋداعى قاۋىپسىزدىگىن قالاداعى ارنايى قىزمەتتىڭ ماماندارى قاداعالايدى. قالالىق ءبىلىم ءبولىمى تۇتىنۋشىلاردىڭ قۇقىن قورعاۋ دەپارتامەنتىمەن بىرلەسە وتىرىپ، وقۋشىلاردىڭ دۇرىس تاماقتانۋىنىڭ ارنايى ءمازىرىن دە جاساپتى.

وقۋشىلار مەن ولاردىڭ اتا- انالارى قالا باسشىلىعىنىڭ بيىلعى تاماشا باستاماسى كەلەر جىلى دا جالعاسىن تاپسا دەگەن تىلەكتەرىن جاسىرمايدى.

 بولات اباعان، الماتى وبلىسى ايقىن- اقپارات