«داۋسى جوق بولسا دا اقشاسىنا، جىلتىراعان ءتۇر-كەلبەتىنە، اعا-كوكەلەرىنە سەنىپ، مىقتى پروديۋسەرلەردىڭ ارقاسىندا ساحنادا تايراڭداپ ءجۇر» دەگەن سەكىلدى سىني پىكىرلەردى ءجيى ەستىپ قالامىز. مۇنداي سىننىڭ ايتىلۋىنا سەبەپ تە جوق ەمەس.
«كىرپى بالاسىن جۇمساعىم» دەر دەمەكشى، شوۋ-بيزنەس سالاسىندا جۇرگەن جانداردىڭ ىشىندە ءوز بالاسىنىڭ قارىم-قابىلەتىن باسقالاردان جوعارى قوياتىندارى دا جەتەرلىك. الايدا قازاقستاندىق بەلگىلى پروديۋسەر، قازاق شوۋ-بيزنەس الەمىنىڭ پاتشايىمى بايان ەسەنتايەۆا حانىم، انشىلىك دارىنى بولماسا كەز كەلگەن كەلبەتتى جىگىت پەن قىزداردان ءانشى جاساۋ مۇمكىن ەمەستىگىن ايتادى. سوندىقتان دا بولار وسى ۋاقىتقا دەيىن قانشاما جاس قىزدان «جۇلدىز» جاساعان بەلگىلى پروديۋسەر ءوز تۋعان قىزدارىن ءانشى رەتىندە ساحناعا شىعارۋعا قۇلشىنعان ەمەس.
جاقىندا بايان ەسەنتايەۆا ءوزىنىڭ ينستاگرام پاراقشاسىنا قىزى ايساۋلە باقىتبەكتىڭ فوتوسىن سالىپ، تومەنگى جاعىنا مىنانداي پىكىر بىلدىرگەن ەدى: «مەنىڭ بالالارىمنىڭ ءان ايتا المايتىندىعىنا وكىنەمىن. ولاردان مىقتى ءانشى شىعاتىنىن بىلسەم، مەن بالالارىما 1000 پايىز سەنىپ، ولار ءۇشىن ەشتەڭەدەن ايانباس ەدىم» دەيدى بايان حانىم.
ەسەنتايەۆانىڭ بۇل پىكىرىنە وقىرماندارى دا ءوز ويلارىن ءبىلدىرىپتى. كەيبىرەۋلەر بايان حانىمعا: «ءوز قىزدارىڭىزدىڭ انشىلىك قىرى جوق ەكەنىن مويىنداعانىڭىزعا شۇكىر، ايتپەسە ءوز بالالارىنان باسقانى مويىندامايتىن، دارىنى بولماسا دا ساحناعا شىعارۋعا بارىن سالاتىندار بار» دەسىپ جاتتى.
بايان ەسەنتايەۆانىڭ ايساۋلە جانە ايارۋ اتتى ەكى قىزى بار. وسى ۋاقىتقا دەيىن ايساۋلە تەلەجۇرگىزۋشىلىك، ايارۋ اسپازدىق قىرىنان كوپشىلىككە تانىلىپ ۇلگەردى. ەڭ باستىسى، باياننىڭ قىزدارىنا ءتيىستى دارەجەدە تاربيە بەرىپ، ولارعا قاشاندا قولداۋ ءبىلدىرىپ وتىراتىنى جۇرتشىلىققا ايان.
Alashainasy.kz