باۋىرجان بايبەكتىڭ ءبىز بىلمەيتىن قىرلارى

الماتى قالاسىنىڭ اكىمى احمەتجان ەسىموۆ «استانا ەكسپو-2017 ۇ ك» اق باسقارما ءتوراعاسى بولىپ تاعايىندالسا، ونىڭ ورنىنا باۋىرجان بايبەك كەلدى.

جاڭا اكىم وسىعان دەيىن «نۇر وتان» پارتياسى ءتوراعاسىنىڭ ءبىرىنشى ورىنباسارى قىزمەتىن اتقارىپ كەلگەن بولاتىن. بۇگىن جاڭا اكىمنىڭ ءبىز بىلە بەرمەيتىن قىرلارى تۋرالى ايتا كەتكەندى ءجون ساناپ وتىرمىز.

باۋىرجان قىدىرعالي ۇلى بايبەك 1974 -جىلدىڭ 19 -ناۋرىزىندا دۇنيەگە كەلگەن. اكەسى بايبەك قىدىرعالي مۇقامەتامىر ۇلى دا جوعارعى لاۋازىمدى قىزمەتكەر بولعان. «الماتى قالاسى بويىنشا جولاۋشىلاردى تاسىمالداۋ» ك م ك باستىعىنىڭ ورىنباسارى بولعان.

ەلباسىمەن ءبىر سىنىپتا وقىعان. ال باۋىرجاننىڭ ءوزى جۇمىسىن ماينداعى فرانكفۋرت قالاسى ق ر باس كونسۋلدىعىنىڭ رەفەرەنتى، اتتاشەسى - گ ف ر- داعى ق ر ەلشىلىگى ەكونوميكالىق ءبولىمىنىڭ ءۇشىنشى حاتشىسىنان باستادى. 2002 -جىلى ق ر پرەزيدەنتى اكىمشىلىگى جۇيەلى زەرتتەۋلەر ورتالىعىنىڭ ساراپشىسى بولدى. 2003 -جىلى - ق ر پرەزيدەنتى حاتتاماسىنىڭ اقپارات پەن تالداۋ سەكتورىنىڭ مەڭگەرۋشىسى، 2004 -جىلى - باس ينسپەكتورى، 2006 -جىلى - حاتتاما جەتەكشىسى قىزمەتتەرىن ابىرويمەن اتقاردى. 2009 -جىلدىڭ تامىز ايىندا ق ر پرەزيدەنتى اكىمشىلىگى جەتەكشىسىنىڭ ورىنباسارى بولدى.

باۋىرجان بايبەكتىڭ ءبىز بىلمەيتىن قىرلارى كوپ. اكەسى دە، اناسى دا مۋزىكا ونەرىن جوعارى باعالاعان. ال ءوزى بولسا الماتىداعى كۇلاش بايسەيىتوۆا اتىنداعى رەسپۋبليكالىق مۋزىكا مەكتەبىنىڭ فورتەپيانو سىنىبى بويىنشا ءتالىم العان. كەيىن «بولاشاق» باعدارلاماسى بويىنشا ەۋروپاداعى ەڭ بەدەلدى ونەر وردالارىنىڭ ءبىرى - گەرمانيانىڭ ليۋبەك قالاسىنداعى مۋزىكالىق جوعارى مەكتەپتى بىتىرگەن. ون ساۋساعىنان ونەر تامعان باۋىرجان بايبەك ءداستۇرلى قازاق اندەرى مەن كلاسسيكالىق مۋزىكامەن قاتار، دجازدى قاتتى ۇناتادى. اسىرەسە، نەمىس جانە اعىلشىن تىلدەرىندە ءان ايتقاندى جاقسى كورەدى ەكەن.

باۋىرجان بايبەك -  پوليگلوت. ول قازاق، ورىس، اعىلشىن تىلدەرىن جەتىك مەڭگەرگەن. «بولاشاق» باعدارلاماسىمەن شەتەلدە ءبىلىم العان بارلىق قازاقستاندىق جاستاردىڭ كوشباسشىسى.

- باۋىرجان بايبەك - جوعارعى لاۋازىمعا تاعايىندالىپ وتىرعان «بولاشاق» باعدارلاماسىنىڭ ءبىرىنشى تۇلەگى. ول سىرتقى ىستەر مينيسترلىگى جۇيەسىندە، پرەزيدەنت اكىمشىلىگىندە جۇمىس ىستەدى. «نۇر وتان» پارتياسى ءتوراعاسىنىڭ ءبىرىنشى ورىنباسارى بولدى. قاسىمدا جۇمىس ىستەي ءجۇرىپ، مەنىڭ قىزمەتىمدى كوردى، بۇكىل رەسپۋبليكامىزدى ارالادى، ماڭىزدى سايلاۋ ناۋقاندارىنا قاتىستى. ءبىزدى الدا پارلامەنتتىك سايلاۋ كۇتىپ تۇر. بۇل - وڭاي سىناق ەمەس. ونىڭ قالا الدىندا تۇرعان مىندەتتەردى ەلدە جۇزەگە اسىرىلىپ جاتقان باعدارلامالار اياسىندا سىزدەرمەن بىرلەسىپ شەشە الاتىنىنا سەنىمدىمىن، - دەدى.

الماتى قالاسىنىڭ جاڭا اكىمى - كاسىپقوي سپورتشى دا. باۋىرجان قولىنان فورتەپيانودا ويناۋ عانا كەلەتىن جان دەپ ەسەپتەسەڭىز، قاتتى قاتەلەسەسىز. كەزىندە شىعىس جەكپە-جەك ءتۇرى - كاراتەمەن شۇعىلدانىپ، قازاقستاننىڭ ەكى دۇركىن چەمپيونى اتانعان. سۋدا ءجۇزۋ مەن اتقا ءمىنۋدى حوببي سانايدى.

باۋىرجان بايبەك «قۇرمەت» (2008) وردەنىمەن، «قازاقستان رەسپۋبليكاسىنىڭ تاۋەلسىزدىگىنە 10 جىل» (2001) ، «استانانىڭ 10 جىلدىعى» (2008) مەدالدارىمەن، ق ر پرەزيدەنتىنىڭ العىس گراموتالارىمەن (2001, 2010) ماراپاتتالعان. الماتى قالاسىنىڭ اكىمى قىزمەتىنە 9 -تامىزدان باستاپ كىرىستى.

«ماسساگەت»