«ءۇش قاسيەت بار. وسى ۇشەۋى كىمدە بولسا وندا ول يماننىڭ ءدامىن سەزەدى: اللاھ پەن ەلشىسىن وزگەنىڭ بارىنەن ارتىق ءسۇيۋ، ءبىر ادامدى اللاھ ريزالىعى ءۇشىن عانا جاقسى كورۋ جانە اللاھ كۇپىرلىكتەن قۇتقارىپ يسلامدى ءناسىپ ەتكەننەن كەيىن قايتادان يمانسىزدىققا ورالۋدان وتقا قۇلاپ كەتەتىندەي دەڭگەيدە قورقۋ».
ناعىز تاقۋالىق اللاھ پەن ونىڭ ەلشىسىن بارىنەن دە ارتىق ءسۇيۋ ارقىلى بولادى. حاق تاعالا مەن ونىڭ پايعامبارىن وزگەدەن ارتىق سۇيە الماعان ادام ناعىز مۇسىلمان بولا المايدى. ەندەشە شىنايى يماننىڭ بەلگىسى - سول ەكەۋى ءۇشىن قاجەت جەرىندە سۇيىنە دە كۇيىنە دە ءبىلۋ. ءبىراق ادام جۇرەگىندەگى وسى سۇيىسپەنشىلىكتىڭ بارلىعىن ياكي قانشالىقتى دەڭگەيدە ەكەنىن قالاي بىلەدى؟
ءسىز كەشكە ۇيىڭىزگە دۇنيە دەگەن بازار الەمىنەن كوپ ساۋدا جاساپ ودان قىرۋار پايدا تاۋىپ ورالساڭىز قانداي كوڭىل كۇيدە بولاسىز؟ مىنە سول سياقتى الەمدە يسلام دىنىنە قاتىستى ءبىر جاعىمدى جاڭالىق ەستىگەندە ياكي ءبىر ادامنىڭ اقىرعى پايعامبار تۋرالى جاقسى ءبىر كىتاپ وقىپ وعان دەگەن سۇيىسپەنشىلىگىم ارتا ءتۇستى دەگەن كەزدە كوڭىل كۇيىڭىز تىم بولماسا الگىندەي كوتىرەلىپ جاتسا وندا ءسىزدىڭ جۇرەگىڭىزدە حاق تاعالاعا جانە ونىڭ ەلشىسىنە دەگەن سۇيىسپەنشىلىك بار دەگەن ءسوز.
سونداي اق ءسىز كەشكە ۇيىڭىزگە قىرىق جىلدىق بار تاپقانىڭىزدان ايىرىلىپ تاقىر كەدەي بولىپ ورالساڭىز ءسىز قانداي كۇيدە بولاسىز؟
مىنە سول سياقتى الەمدە يسلام دىنىنە قانداي ءبىر كۇيە جاعىلعانىن ەستىگەندە ياكي ءبىر ادامنىڭ دىنسىزدىك تانىتىپ اللاھ تاعالا مەن ونىڭ ەلشىسىنە ءتىل تيگىزگەن كەزدە تىم قۇرىسا ءدال الگىندەي كۇيىنە بىلسەڭىز وندا ءسىزدىڭ جۇرەگىڭىزدە ول ەكەۋىنە دەگەن سۇيىسپەنشىلىك پەن ماحاببات بار دەگەن ءسوز.
وسىدان بىرنەشە جىل بۇرىن ءبىر مۇسىلمان ەلىنىڭ تەلەارناسىندا تىكەلەي پايعامبارىمىزعا قاتىستى ءدىني سۇقبات جۇرگىزىلەدى. سوعان ادەيىلەپ سول ەلدىڭ اتاقتى ءدىنتانۋشى پروفەسسورىن شاقىرادى. الگى پروفەسسور پايعامبارىمىز جايلى «ول دا ءبىز سياقتى قاراپايىم ادام. پەندە بولىپ قاتەلىك جاسايدى. مىسالى ونىڭ پالەن تاقىرىپ قاتىستى مىناداي ءحاديسى بار. ءبىراق مەن ونىڭ پىكىرىنە قوسىلا المايمىن» تاعىسىن تاعى دەپ اقىرعى پايعامباردى جاي ادام ەتىپ سىناپ وتىرادى.
وسى كەزدە تىكەلەي ەفيرگە حريستيان ەلىندە ءومىر سۇرگەن مۇسىلمانداردىڭ ءبىر تاريحاتىنىڭ شەيحى تەلەفون سوعىپ الگى پروفەسسورعا: «ءسىز نەگە مەنىڭ پايعامبارىما جاي ادام رەتىندە قاراپ ءتىل تيگىزەسىز. ءسىزدىڭ پايعامبارىمىزدى سىناپ ونىڭ حاديستەرىنە قاداعان ءار ءبىر تىكەن ءسوزىڭىز مەنىڭ جۇرەگىمە نايزا بولىپ قادالۋدا. اللاھ تاعالانىڭ سۇيىكتىسى ءھام عالامزاتتىڭ راقىم پايعامبارىن سىنايتىنداي ءسىز كىم ەدىڭىز؟» دەيدى. ءبىراق الگى ءدىنتانۋشى «ءسىز دىنگە قاراپايىم كوزبەن قارايسىز، ال بىزدەر (ءدىنتانۋشىلار) دىنگە سىن كوزبەن قارايمىز» دەپ بوي بەرمەگەن سوڭ الگى شەيح تەلەفوندى قويا سالادى.
بىرنەشە كۇننەن سوڭ الگى حريستيان ەلىنەن ءبىر توپ ادام ۇشاقپەن الگى مۇسىلمان ەلگە كەلىپ پروفەسسوردى ىزدەپ تابادى. ولار وعان: «ءسىزدىڭ پايعامبارىمىزدى سىناعانىڭىز ۇلكەن قاتەلىك ەدى. ۇستازىمىز ءسىزدىڭ سونداعى سىن سوزدەرىڭىزگە شىداي الماي تەلەفوندى تاستاي سالدى. سول ءتۇنى ول ءتۇنى بويى قاتتى كۇيىنىپ ءۇي ىشىندە ءارى بەرى جۇرە بەردى. «مەنىڭ پايعامبارىما ءتىل تيگىزۋگە قانداي قاقىسى بار، كىم ول سونشا؟» دەپ وزەگى ورتەنگەن ول وسىنداي سوزدەردى قايتالاي بەردى. قاتتى كۇيزەلگەن ول ىشتەي وت بولىپ جانىپ تاڭعى جۋىق جۇرەكپەن قۇلادى. قانشا جانتالاسقانمەن قۇتقارا المادىق. سول كۇيىنگەن كۇيى اقىرەت الەمىنە ءجۇرىپ كەتتى» دەيدى. وسى سوزدەردى ەستىگەن كەزدە الگى پروفەسسور كەنەتتەن شوشىپ جۇرەگى ءدىر ەتە قالادى دا جاس كەزىندەگى جوعالتقان يمانىن قايتا تابادى. بەينە ءبىر قىرىق جىل جىندانىپ ەسىن جيعان ادامداي جان جاعىنا قاراپ، ىستەگەن قىلىعىنان قاتتى ۇيالىپ تاۋبەگە كەلەدى.
مىنە بۇل شەيحتىڭ پايعامبار ءۇشىن كۇيىنىپ ءولىپ كەتۋى ونى جاراتىلىستىڭ ىشىندە بارىنەن ارتىق سۇيگەندىگىنىڭ بەلگىسى. كۇيىنە الماعان سۇيىنە المايدى.
ءيا، سۇيىكتى پايعامبارىمىز اتا انامىزدان دا، بالا شاعامىزدان دا، بارىنەن دە ارتىق. ساحابالاردىڭ «پايعامبارىم! جولىڭا اتا انام قۇربان!» دەۋلەرى وسىنىڭ ايعاعى. سول سەبەپتى قۇراندا اللاھ تاعالا:
قُلْ إِن كَانَ آبَاؤُكُمْ وَأَبْنَآؤُكُمْ وَإِخْوَانُكُمْ وَأَزْوَاجُكُمْ وَعَشِيرَتُكُمْ وَأَمْوَالٌ اقْتَرَفْتُمُوهَا وَتِجَارَةٌ تَخْشَوْنَ كَسَادَهَا وَمَسَاكِنُ تَرْضَوْنَهَا أَحَبَّ إِلَيْكُم مِّنَ اللّهِ وَرَسُولِهِ وَجِهَادٍ فِي سَبِيلِهِ فَتَرَبَّصُواْ حَتَّى يَأْتِيَ اللّهُ بِأَمْرِهِ وَاللّهُ لاَ يَهْدِي الْقَوْمَ الْفَاسِقِينَ
«ەي، مۇحاممەد ولارعا: «ەگەر اكەلەرىڭدى، بالالارىڭدى، تۋىستارىڭدى، ايەلدەرىڭدى، اعايىندارىڭدى، تاپقان مالدارىڭدى، توقتاپ قالۋىنان قورىققان ساۋدالارىڭدى، جاقسى كورىپ راقات قىزىعىن كورگەن ۇيلەرىڭدى اللاھ تاعالادان، ونىڭ ەلشىسىنەن ءارى ونىڭ جولىندا كۇش قايرات جۇمساۋدان الدە قايدا ارتىق ساناپ، اسا جاقسى كورەتىن بولساڭدار وندا حاق تاعالانىڭ ءامىرى كەلگەنگە دەيىن كۇتىڭدەر. اللاھ پاسىق ادامداردى تۋرا جولعا سالمايدى» دە» دەپ ايتادى .
حاق تاعالا پەندەسىن ءسۇيىپ جاراتتى. جاراتقانمەن قويماي حاليفا ەتىپ كۇللى عالامدى وعان قاراتتى. جۇرەگىنە يمان بەرىپ، پايعامبارى ارقىلى يسلام ءدىنىن تاراتتى. ەندەشە ءسۇيىپ جاراتقان جاراتۋشىسىن پەندەسى نەگە جاقسى كورمەسكە؟!
ءھام اللاھ ەلشىسى دە «شىر» ەتىپ دۇنيەگە كەلگەن شاقتان باستاپ «ۇمبەتىم» دەپ بەزەك قاقتى. ءومىر باقي ۇمبەتىنىڭ ەكى دۇنيەلىك باقىتىن ويلاپ كوز جاسىن كول ەتۋمەن ءوتتى. كوز جۇمار الدىندا دا «ۇمبەتىم، ۇمبەتىم» دەپ كوز جۇمدى. كۇن ەرتەڭ ماقشار دا وسىلاي حاق تاعالانىڭ قۇزىرىندا ۇمبەتىنە شاپاعاتشى بولماق. ەندەشە وسىنداي پايعامباردى ونىڭ ۇمبەتى نەگە سۇيمەسكە!؟
ابدۋللاھ يبن حيشامنان مىناداي حابار بىزگە جەتكەن: «بىردە پايعامبارمەن بىرگە وتىرعانبىز. اللاھ ەلشىسى وماردىڭ قولىنان ۇستادى. ومار: «پايعامبارىم! مەن ءسىزدى بارىنەن دە ارتىق جاقسى كورەمىن. ءبىراق جانىمنان ارتىق ەمەس» دەدى. سوندا اللاھ ەلشىسى: «جوق، ولاي دەۋشى بولما. عۇمىرىم قۇدىرەتتى قولىندا بولعان اللاھ تاعالاعا انت ەتەيىن! سەن مەنى ومىرىڭنەن ارتىق جاقسى كورمەيىنشە (يمانىڭ تولىق بولمايدى) » دەيدى. وسى كەزدە ومار: «پايعامبارىم! ولاي بولسا ءدال قازىر ءسىز ماعان جانىمنان دا ارتىقسىز» دەپ جاۋاپ بەردى. اللاھ ەلشىسى: «ومار! مىنە ەندى يمانىڭ تولىق بولدى» دەدى».
مىنا حاديس تە وسىنى قۋاتتايدى.
عَنْ أَنَسٍ قَالَ
قَالَ النَّبِيُّ صَلَّى اللَّهُ عَلَيْهِ وَسَلَّمَ لَا يُؤْمِنُ أَحَدُكُمْ حَتَّى أَكُونَ أَحَبَّ إِلَيْهِ مِنْ وَالِدِهِ وَوَلَدِهِ وَالنَّاسِ أَجْمَعِينَ
«ءلاا يۋمينۋ احادۋكۋم ءحاتتاا اكۋۋنا ءاحاببۋ ءيلايھي مين ءۋااليديھي ءۋا ءۋالاديھي ءۋان ءنااسي ءاجماعيين».
حازىرەتى ءاناس جەتكىزەدى: اللا ەلشىسى (س. ا. ۋ. ): «ارالارىڭدا ەشكىم مەنى اكەسىنەن، بالاسىنان جانە كۇللى ادامداردان ارتىق سۇيمەيىنشە يمان ەتە المايدى» دەدى. باسقا ءبىر حاديستە «دۇنيە مۇلكى مەن مالىنان جانە وت باسىنان دا ارتىق جاقسى كورمەيىنشە» دەيدى.
ەندەشە حاق تاعالا مەن ونىڭ پايعامبارىن بارىنەن دە ارتىق جاقسى كورگەن ادام جۇرەگىندەگى يمان ءدامى مەن ءلاززاتىن سەزەدى.
مۇحيتدين يسا ۇلى
mazhab.kz