كوكسۋ اۋدانىندا تۇيە شارۋاشىلىعى مەملەكەت قولداۋىنا يە بولدى - الماتى وبلىسى - فوتو

استانا. قازاقپارات - الماتى وبلىسى كوكسۋ اۋدانى بالپىق ءبي اۋىلىندا دامىپ كەلە جاتقان تۇيە شارۋاشىلىعى مەملەكەت قولداۋىنا يە بولدى.

كاسىپكەر مەيرامبەك وتاربايدىڭ مەنشىگىندەگى «مەيرامبەك» ج ك- عا اۋداندىق اكىمدىكتىڭ قولداۋىمەن تۇيە جايىلىمى ءۇشىن 500 گەكتار جەر بەرىلدى.

جاقىندا كاسىپكەر فەرماسىن ودان ءارى ۇلعايتۋ جانە تۇيە سانىن ارتتىرۋ ماقساتىندا «سبەربانك» ا ق- عا 7 ميلليون تەڭگە كولەمىندە نەسيە الۋعا تاپسىرىس بەرگەن. جوبا الماتى وبلىسىنىڭ اكىمدىگى تاراپىنان قولداۋعا يە بولىپ، 6,5 پروتسەنت جەڭىلدىكپەن نەسيە ءبولىندى.

ال «دامۋ» قورى بيزنەستى قولداۋ مەن دامىتۋ باعىتىنداعى «بيزنەستىڭ جول كارتاسى - 2020» باعدارلاماسى شەڭبەرىندە جوبا بويىنشا 5,3 ميلليون تەڭگە كولەمىندە ءوز كەپىلدىگىن ۇسىندى. نەسيە قاراجاتىنا «مەيرامبەك» ج ك قوسىمشا تاعى 9 تۇيە مەن 7 جىلقى ساتىپ الدى.

بۇگىنگى كۇنى وتاربايدىڭ تۇيەسىنىڭ سانى تولىمەن قوسا العاندا وتىزعا جۋىقتادى. كاسىپكەردىڭ ءتۇرلى ۇلتتىق سۋسىندار مەن تاعامدار ۇسىناتىن شۇباتحاناسى جۇمىس ىستەيدى.