الماتى وبلىسىندا «ورلەۋ» باعدارلاماسى جۇزەگە اسىرىلادى

استانا. قازاقپارات - الماتى وبلىسىندا جاڭا «ورلەۋ» جوباسىن جۇزەگە اسىراتىن ايماق رەتىندە ەڭبەكشى قازاق اۋدانى تاڭدالىپ الىندى.

جوبانى جۇزەگە اسىرۋعا وبلىستىق بيۋدجەتتەن 2015-جىلى 40,9 ميلليون تەڭگە ءبولىندى. بۇل تۋرالى وبلىس اكىمىنىڭ باسپا ءسوز قىزمەتىنەن حابارلادى.

جوبا اياسىندا از قامتىلعاندار قاتارىنداعى 1277 مۇشەسى بار 365 وتباسىنا الەۋمەتتىك كومەك كورسەتۋ جوسپارلانعان. بۇل وتباسىلارىنداعى ەڭبەككە قابىلەتتى ازاماتتار سانى - 384 ادام.

الماتى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى قانىبەك ايتجانوۆتىڭ ايتۋىنشا، جوبانى جۇزەگە اسىرۋدان بۇرىن ەڭبەكشى قازاق اۋدانىنىڭ بارلىق 26 اۋىلدىق وكرۋگتەرىندە، سول سياقتى وبلىستىڭ اۋدان، قالالارىندا ارنايى قۇرىلعان جەدەل توپ اقپاراتتىق-ءتۇسىندىرۋ جۇمىستارىن جۇرگىزگەن. بۇگىنگى كۇنى جوباعا قاتىسۋعا ەڭبەكشى قازاق اۋدانىنىڭ 29 تۇرعىنى تاپسىرىس بەردى. ونىڭ 8 ءى تۇراقتى جۇمىسقا ورنالاستىرىلسا، 21 ءى تولەم اقىلى قوعامدىق جۇمىسقا تارتىلدى. ءسويتىپ، جوبانى جۇزەگە اسىرۋ قازىردەن بەلسەندى اتقارىلۋدا.

جالپى، «ورلەۋ» جوباسى - وتباسىنىڭ ەڭبەككە قابىلەتتى مۇشەلەرى جۇمىسپەن قامتۋدىڭ بەلسەندى تۇرلەرىنە جانە «جۇمىسپەن قامتۋ جول كارتاسى-2020» باعدارلاماسىنا قاتىسقان جاعدايدا وتباسىن بەلسەندىلەندىرۋ الەۋمەتتىك كەلىسىم-شارتىنا وتىرۋ ارقىلى وتباسىلارعا شارتتى قارجىلاي كومەك ۇسىنۋ باعدارلاماسى. بۇدان بولەك، جوبا جۇمىسقا ورنالاستىرۋعا، ماماندىقتارعا وقىتۋعا، قايتا وقىتۋعا، سول سياقتى جاستار پراكتيكاسىنا قوعامدىق جۇمىسقا جانە الەۋمەتتىك جۇمىس ورىندارىنا تارتۋعا ىقپال ەتە الادى.

جوبانىڭ نەگىزگى ماقساتى - شارتتى قارجىلاي كومەك العان العان از قامتىلعان وتباسى تەك قانا جاردەماقى الىپ قانا قويماي، وسى جاعدايدان شىعۋعا الەۋمەتتىك تۇرعىدان بەيىمدەلگەن، كاسىبي باعدار العان بولۋى ءتيىس. اتالمىش جوبا 1- شىلدەدەن بەرى قاناتقاقتى جوبالار بەلگىلەنگەن وزگە دە وبلىستاردا جۇزەگە اسىرىلا باستادى.

ايتا كەتۋ كەرەك، «5 ينستيتۋتسيونالدى رەفورمانى جۇزەگە اسىرۋ باعىتىنداعى 100 ناقتى قادام» ۇلت جوسپارىنداعى 84- قادامدا «الەۋمەتتىك كومەكتى ونىڭ اتاۋلى سيپاتىن كۇشەيتە وتىرىپ، وڭتايلاندىرۋ» قاراستىرىلعان. وسىعان بايلانىستى دەنساۋلىق ساقتاۋ جانە الەۋمەتتىك دامۋ مينيسترلىگى از قامتىلعاندار ساناتىنداعى ازاماتتاردى الەۋمەتتىك قورعاۋدىڭ پاسسيۆتى مودەلىنەن بەلسەندى مودەلىنە اۋىستىرۋدى قاراستىراتىن «ورلەۋ» جوباسىن باستاعان بولاتىن.