ەتنو-مادەني بىرلەستىكتەر «قازاق حالقىنا العىس كۇنى» مەرەكەسىن اتاپ ءوتۋدى ۇسىنۋدا
اتالمىش باستامانى قازاقستان حالقى اسسامبلەياسىنىڭ «ۇلكەن ەل - ۇلكەن وتباسى» جوباسىنىڭ اياسىندا جۇزەگە اسىرۋ كوزدەلىپ وتىر.
بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا «قوعامدىق كەلىسىم» ر م م ديرەكتورى ناتاليا كالاشنيكوۆا ءمالىم ەتتى.
ايتا كەتەيىك، «ۇلكەن ەل - ۇلكەن وتباسى» جوباسىن ەلباسى «100 ناقتى قادامنىڭ» 86 قادامىندا تاپسىرعان بولاتىن. ن. كالاشنيكوۆانىڭ ايتۋىنشا، بۇل جوبا حالقىمىزدىڭ بىرتەكتىلىگىن قالىپتاستىرۋعا باعىتتالعان.
«حالقىمىزدىڭ بىرتەكتىلىگىن قالىپتاستىرۋ ۇدەرىسى ماڭگى جۇرەدى. «ۇلكەن ەل - ۇلكەن وتباسى» جوباسىنىڭ قاعيداتتارىن قۇرۋ، شارالار جوسپارىن جاساقتاۋ بويىنشا جۇمىستار باستالدى. مىسالى، «قازاق حالقىنا العىس كۇنى» اتاۋلى مەرەكەسىن اتاپ ءوتۋ، الەۋمەتتىك كومەك كورسەتۋ بويىنشا «قايىرىمدىلىق كەرۋەنى» شاراسىن وتكىزۋ، جىبەك جولىنا قاتىستى سۇحبات الاڭدارىن قۇرۋ سياقتى جوبالار قولعا الىنادى. مەملەكەتتىك الەۋمەتتىك سەرىكتەستىك نەگىزىندە وعان ەتنو-مادەني بىرلەستىكتەردىڭ باسشىلارى مەن مۇشەلەرى بەلسەندى قاتىسادى»، - دەپ اتاپ ءوتتى ناتاليا كالاشنيكوۆا.
مەكەمە ديرەكتورىنىڭ سوزىنە قاراعاندا، قازىرگى ۋاقىتتا ەلىمىزدە 900 دەن استام ەتنو-مادەني بىرلەستىكتەر بار. ولاردىڭ ءارقايسىسى قازاقستاننىڭ قوعامدىق كەلىسىمىن بەكىتىپ قانا قويماي، ەلىمىزدىڭ مادەني سانالۋاندىلىعىن دامىتۋعا، ازاماتتىق بىرتەكتىلىك قاعيداتتاردىڭ ورناۋىنا ۇلكەن ۇلەستەرىن قوسىپ جاتىر.
«وسى تۇرعىدا ەتنو-مادەني بىرلەستىكتەر مەن اسسامبلەيانىڭ قوعامدىق ۇيىمدارى وسى جوبانىڭ ءرولى مەن ماڭىزىن بەلسەندى تالقىلاۋدا. سونىمەن قاتار مەملەكەت باسشىسىنىڭ «100 ناقتى قادام» اياسىندا تاعى ءبىر تاپسىرما - جالپى مەملەكەتتىك مىندەتتەردى ورىنداۋعا ەتنو-مادەني بىرلەستىكتەردى قاتىستىرۋ ورىندالۋدا»، - دەيدى ول.
اۆتور: جاسۇلان جولدىبايەۆ