پاۆلودار وبلىسىندا اق قايىڭ وڭدەيتىن جاڭا كومبينات ىسكە قوسىلدى

استانا. قازاقپارات - پاۆلودار وبلىسىنىڭ جەلەزينكا اۋدانىندا اعاش وڭدەيتىن جاڭا كومبينات ىسكە قوسىلدى.

كاسىپورىن تەك قايىڭ اعاشىن وڭدەۋگە باعىتتالعان. ءوندىرىس باسشىلىعى مۇنىڭ جيھاز جاساۋعا تاپتىرماس قۇندى ماتەريال ەكەنىن ايتادى.

ونى وڭدەۋ ءىسى باسقا اعاشتاردان كۇردەلىرەك كەلەدى ەكەن. جاڭا كومبيناتتىڭ جۇمىسىنا تەك اۋىل ازاماتتارى تارتىلعان. ولار اسا مۇقيات بولۋعا تىرىسادى. ويتكەنى قايىڭدى ءتىلۋ زەرگەردىڭ شەبەرلىگىن تالاپ ەتەدى.

«ءاربىر تاقتايدان جاقسى ماتەريالدى مەيلىنشە كوپ الۋعا كۇش سالامىز. ويتكەنى ودان قۇندى دۇنيە جاسالادى»، - دەيدى اعاش جونۋشى گادان كابۋلوۆ.

اعاش وڭدەۋشىلەر ءبىر قايىڭنان 30 پايىز عانا تاۋارلى ماتەريال الادى. قالعانى جارامسىز. سوندىقتان ماڭىزدى شارۋا اعاش تىلەتىن سەحتا ەڭ جاڭا تەحنولوگيالىق جەلىنىڭ كومەگىمەن اتقارىلادى.

اعاش وڭدەۋ كومبيناتى ديرەكتورىنىڭ ورىنباسارى قابىش سەرىكبايەۆتىڭ ايتۋىنشا، كەلەشەكتە بۇل سەح كونۆەيەرلىك سەحقا اۋىسادى. «ءوندىرىستىڭ قۋاتتىلىعىن ارتتىرىپ، قايىڭنان ساپاسى جوعارى ءونىم الۋ ءۇشىن ءبىز ستانوكتاردىڭ ساپاسىنا كوز جەتكىزۋىمىز كەرەك»، - دەيدى ول.

قايىڭ وڭدەۋ ءوندىرىسى تولىعىمەن سىرتقى نارىققا باعىتتالعان. ازىرگە قازاقستان بويىنشا بۇل ونىمگە سۇرانىس جوق كورىنەدى.

«اققايىڭدى رەسەيدىڭ جيھاز جاسايتىن تانىمال كومپانيالارى تۇتىنادى. بەرىكتىگى جاعىنان ەمەنگە دەس بەرمەيتىن اعاشتان باسپالداقتار، ادەمى ساتىلار مەن ءتۇرلى جيھازدار جاسالادى»، - دەيدى اعاش وڭدەۋ كومبيناتىنىڭ ديرەكتورى ارتۋر دانايان.

كەپتىرۋدەن سوڭ دايىن ءونىم تاعى 10 پايىزىن جوعالتادى. ءبىراق وندىرىسكە جاراماعان قالدىقتار دالادا قالمايدى. كەلەشەكتە قۇرىلىس ماتەريالدارىن ونىڭ ىشىندە كىرپىش، اعاش كومىرىن جاساۋ ءىسىن جولعا قويامىز دەيدى ءوندىرىس يەلەرى. تابيعي تەپە-تەڭدىك جويىلماس ءۇشىن ولار اعاشى سيرەتىلەتىن ورماندى قالپىنا كەلتىرۋ جۇمىستارىمەن قوسا اينالىسادى. جەلەزينكا اۋدانىندا شيكىزاتتىڭ مول قورى ساقتالعان. ال اعاش وڭدەۋ كومبيناتىنىڭ اشىلۋى شاعىن اۋىلدىڭ تامىرىنا قان جۇگىرتكەندەي اسەر بەردى. قازىرگى كۇنى 37 تۇرعىن تۇراقتى جۇمىسپەن قامتىلعان، دەپ جازادى 24.kz.