كاسىپكەر رەزەڭكەدەن ورنەك تاس توسەمىن شىعاردى

اتىراۋ. قازاقپارات - اتىراۋدا جاس كاسىپكەر اماندىق جايبەرگەنوۆ رەزەڭكەدەن ورنەك تاس توسەمدەرىن جاساپ شىعاردى.

ا. جايبەرگەنوۆ بۇل ءىسىن باستار الىندا وڭىردەگى نارىققا زەرتتەۋ جۇرگىزگەن. ءسويتىپ، ۇگىتىلگەن رەزەڭكەدەن ورنەك تاس توسەمدەرىن جاساۋ ءىسىن ورىستەتۋگە بەكەم بەل بۋىپتى.

سونان سوڭ «دامۋ» قورى ارقىلى نەسيە الىپ، وعان ءوزىنىڭ جيناعىنان قاراجات قوسقان. جەرگىلىكتى بيزنەس-ينكۋباتوردان بارلىق ينفراقۇرىلىمى دايىن عيماراتتى ارزان باعاعا جالعا الىپ وتىر. كاسىپورنىندا جۇمىس ىستەيتىن 4 ادام رەسەيلىك مامانداردان شەبەرلىك شىڭداعان. ولار ءبىر ايدىڭ ىشىندە 1 مىڭ شارشى مەترگە جۋىق ورنەك تاس توسەمىن شىعارۋعا قول جەتكىزدى.

«ەگەر ۇسىنىس بولسا، ايىنا 3 مىڭ شارشى مەترگە دەيىن ءونىم شىعاراتىن مۇمكىندىگىمىز بار»، - دەيدى اماندىق جايبەرگەنوۆ. ونىڭ ايتۋىنشا، ۇگىتىلگەن رەزەڭكە اۋەلى ارنايى اپپاراتتا سىعىمدالادى. سودان كەيىن پەشتە قىزدىرىلىپ، 7 ساعاتتان سوڭ دايىن ونىمگە اينالادى. شيكىزات رەتىندە ەسكىرگەن كولىك دوڭگەلەگى قولدانىلادى. ونى ۇگىتىلگەن كۇيىندە رەسەيدەن الىپ وتىر، دەپ حابارلادى egemen.kz.