سۇلتانداردىڭ زيراتىن قالپىنا كەلتىرۋ جۇمىستارى باستى نازارعا الىنباق

استانا. قازاقپارات - پاۆلودار وبلىسىنىڭ مارالدى كولىنىڭ ماڭىنداعى كونە قورىمدا ەل بيلەگەن سۇلتانداردىڭ زيراتتارىن سۋ شايىپ كەتۋ قاۋپى ءتونىپ تۇرعانىن وتكەن جاڭالىقتارىمىزدا ايتقان بولاتىنبىز.

ارنامىزدان ەفيرگە شىققان ماتەريالدان كەيىن پاۆلودارلىق «مايدان جولى» پاتريوتتىق- ىزدەستىرۋ جاساعىنىڭ ماماندارى ماسەلەگە ارالاسۋدى ءجون سانادى. ولار پاۆلودار مەملەكەتتىك پەداگوگيكالىق ينستيتۋتىنىڭ ارحەولوگيالىق ورتالىعىنىڭ ماماندارىمەن بىرلەسىپ، كونە قورىم ايماعىنا جول تارتپاق. وندا بىلىكتى ماماندار زەرتتەۋ جۇمىستارىن جۇرگىزىپ، قاجەتتى شارالاردى جاساۋدى جوسپارلاپ وتىر.

«ەل باسقارعان سۇلتانداردىڭ زيراتىن قالپىنا كەلتىرۋ -  ءبىزدىڭ اسىل پارىزىمىز»، - دەيدى «مايدان جولى» جاساعى كومانديرىنىڭ ورىنباسارى.

رافاەل مۇحامەدجانوۆ، «مايدان جولى» پاتريوتتىق- ىزدەستىرۋ جاساعى كومانديرىنىڭ ورىنباسارى:

- بۇل ماسەلەنى ءبىز ءسىزدىڭ ارنالارىڭىزداعى جاڭالىقتاردان كورىپ، بىلدىك. وسىدان كەيىن ءبىزدىڭ «مايدان جولى» جاساعىمىزعا جىلىبۇلاق اۋىلىنىڭ تۇرعىندارى كەلىپ، كومەك بەرۋىمىزدى سۇرادى. ءبىز الداعى ۋاقىتتا قاجەتتى شارالاردى قولعا الىپ، مارالدى كولىنىڭ جانىندا ەكسپەديتسيا جۇمىستارىن جۇرگىزەمىز.

ەسكە سالا كەتەيىك، مارالدى كولىنىڭ جانىنداعى كونە زيراتتى سۋ شايىپ، تۇرعىنداردى ابىگەرگە سالىپ جاتىر. ەڭ وزەكتىسى بۇل جەردە ەرتىس- بايان وڭىرىنە تانىمال سۇلتانداردىڭ سۇيەگى بولۋى مۇمكىن. ال جەرگىلىكتى ولكەتانۋشىلار وڭىردە قىپشاق ۇلىسىنىڭ كوسەمى سۇلتانبەتتىڭ ۇرپاقتارى -  قانعوجا، بوپى، ارىنعازى سۇلتانداردىڭ جەرلەنگەنىنە سەنىمدى. سەبەبى ومبىنىڭ مۇراعاتىنان الىنعان ارنايى كارتادا بۇل جەردە سۇلتانداردىڭ زيراتى بار ەكەنى جازىلعان.

www.24.kz