عالىم قازاقستان جەرىنىڭ نەلىكتەن كەڭ ەكەنىن ءتۇسىندىرىپ بەردى

استانا. قازاقپارات - تاريح عىلىمدارىنىڭ دوكتورى قانات وسكەنباي قازاقستان كوشپەندى اتا-بابالارىمىزدىڭ ارقاسىندا كەڭ اۋماقتى الىپ جاتىر دەپ ەسەپتەيدى.

«قازاقتار مەن قازاق مەملەكەتى ەكى مىڭ جىل بۇرىنعى كوشپەلى مادەنيەتتەن قالعان جالعىز مۇرا. بۇل اۋماق كوشپەندىلەردىڭ دالاسى بولعان. موڭعوليا مەن قازاقستان ءبىزدىڭ زامانىمىزدان بۇرىنعى ءبىرىنشى مىڭجىلدىقتان باستاپ كوشپەندىلەر مادەنيەتى قالىپتاسقان ەكى ۇلى ايماق»، - دەدى عالىم Almaty.tv تەلەارناسىنا بەرگەن سۇحباتىندا.

ونىڭ ايتۋىنشا، قازىرگى كەزدەگى سياقتى ورتا عاسىرداعى قازاقستاننىڭ دا اۋماعىنىڭ كەڭ بولۋى كوشپەندىلەردىڭ وزدەرىنە تيەسىلى اۋماقتى ۇنەمى كەڭەيتىپ وتىرۋىمەن بايلانىستى: «وتىرىقشى مادەنيەتتە ءومىر سۇرگەن كورشىلەرىمىز ءۇشىن ۇلكەن اۋماقتىڭ ماڭىزى بولماعان. وزبەك نەمەسە تاجىك ديحانشىلارىنا ۇلكەن اۋماقتىڭ نە قاجەتى بار؟ ولار ءوز ۇيلەرىنىڭ ماڭىنداعى جەرگە يەلىك ەتىپ، سول جەرگە ەگىن ەككەن. ال كوشپەندىلەر بولسا ءبىر جەردە مەكەندەمەي، وزدەرىنىڭ مالدارىنا ازىق تابۋ ءۇشىن اينالاسىنداعى جەرلەردى الىپ وتىرعان»، - دەدى وسكەنباي.

تاريح عىلىمدارىنىڭ دوكتورى وتە ۇلكەن اۋماققا يەلىك ەتۋدىڭ كوشپەندىلەر مادەنيەتىنىڭ نەگىزى بولعانىن ايتتى. «اقوردا، التىن وردا، موڭعول يمپەرياسى بولدى. موڭعولدارعا دەيىن قىپشاق حاندىعىن قۇرعان قىپشاقتار، قيماق حاندىعىن قۇرعان قيماقتار بولدى - ولاردىڭ بارلىعى قازاقتاردىڭ اتا-باباسى، ال قازىرگى قازاقتار وسىلاردىڭ ارقاسىنا ۇلكەن اۋماققا يەلىك ەتىپ وتىر. بۇل كەڭ ايماق قازاق حاندىعىنا كوشپەندىلەردەن قالعان».

ەسكە سالا كەتەيىك، قازاقستان 2 ميلليون 724,9 مىڭ شارشى مەتر اۋماقتى الىپ جاتىر. ەلىمىز جەر كولەمى جونىنەن الەم بويىنشا توعىزىنشى ورىندا، ال ت م د ەلدەرىنىڭ ىشىندە رەسەيدەن كەيىن ەكىنشى ورىندا تۇر.