قازاقستان دۇنيەجۇزىلىك ساۋدا ۇيىمىنا كىرۋدە رەسەيدىڭ كومەگىن جوعارى باعالايدى

استانا. قازاقپارات - قازاقستان دۇنيەجۇزىلىك ساۋدا ۇيىمىنا كىرۋ ماسەلەسى بويىنشا رەسەيدىڭ كومەگىن جوعارى باعالايدى، دەدى ر ي ا «نوۆوستي» اگەنتتىگىنە قازاقستاننىڭ سىرتقى ىستەر ءمينيسترى ەرلان ىدىرىسوۆ د س ۇ باس كەڭەسىنىڭ قورىتىندىسى بويىنشا.

قازاقستان رەسمي تۇردە 2015-جىلدىڭ سوڭىندا ۇيىمنىڭ 162- مۇشەسى اتانباق.

«رەسەي - ءبىزدىڭ ءىرى ساۋدا-ەكونوميكالىق سەرىكتەسىمىز. سوندىقتان ءبىز قازاقستاننىڭ د س ۇ- عا كىرۋى بويىنشا ارەكەتتەرىمىزدى ۇيلەستىردىك. ءبىز ءاردايىم رەسەي تاراپىنان قولداۋدى سەزىندىك، سوندىقتان بۇل ورتاق جەڭىسىمىز دەپ ويلايمىن. ەۋرازيالىق ەكونوميكالىق وداققا دا بۇل وڭ اسەرىن تيگىزەدى. جاقىن ارادا بەلارۋس ەلى دە د س ۇ- عا كىرۋ ءۇردىسىن اياقتاپ، وداعىمىز بەن بۇل ءىرى ساۋدا ۇيىمى اراسىنداعى ىنتىماقتاستىق پەن ءوزارا ارەكەتتەستىكتىڭ تاعى ءبىر كوپىرى قالانادى دەپ ۇمىتتەنەمىز»، - دەدى ول.

ىدىرىسوۆ اتاپ وتكەندەي، قازاقستان دا رەسەي سياقتى بەلارۋستىڭ د س ۇ- عا كىرۋىنە جاردەمدەسۋگە دايىن. «بىزدە دە، رەسەيدە دە تاجىريبە بار. ءبىز ءبىر ەكونوميكالىق كەڭىستىكتەمىز. سوندىقتان ءبىز ەكونوميكالىق جانە ساياسي جاعىنان بەلورۋسسيانىڭ د س ۇ- عا كىرۋىنە مۇددەلىمىز»، - دەپ اتاپ ءوتتى قازاقستان س ءى م باسشىسى.

ونىڭ سوزىنە قاراعاندا، د س ۇ- عا كىرۋ - قازاقستان ءۇشىن تاريحي قۇبىلىس.

«بۇل - ەكونوميكالىق تۇرعىدا ساپالى وزگەرىس. مەنىڭ پىكىرىمشە، بۇل ەۋرازيالىق وداق ءۇشىن دە ساپالى وزگەرىس»، - دەپ قوستى ول.

دۇنيەجۇزىلىك ساۋدا ۇيىمى (د س ۇ) - حالىقارالىق ساۋدا ەرەجەلەرىن ليبەراليزم پرينتسيپتەرىنە قاراي رەتتەيتىن حالىقارالىق ەكونوميكالىق ۇيىم. قازىر ونىڭ قۇرامىندا 161 مەملەكەت پەن اۋماق بار. رەسەي ۇيىمعا 2012-جىلى كىرگەن. قازاقستان 1996-جىلى 29- قاڭتاردا د س ۇ- عا كىرۋگە ءوتىنىش بىلدىرگەن.