استانادا «الپينيست» ۇرىلار ۇستالدى
استانا ق. ءى ءى د باسپا ءسوز قىزمەتىنىڭ اقپاراتىنشا، «ەسىل» اۋداندىق ءى ءى ب- عا استانا تۇرعىنى پاتەرى تونالعانىن ايتىپ كەلگەن. جەدەل ىزدەستىرۋ شارالارى بارىسىندا ءۇش كۇدىكتى - 24 جاستاعى قوستاناي وبلىسىنىڭ تۇرعىندارى ا. ازاماتى مەن ە. ازاماتى، سونىمەن بىرگە ارقالىق ق. 27 جاستاعى تۇرعىنى م. ازاماتى ۇستالدى.
ۇستالعاندار كىناسىن مويىندادى. ولاردىڭ سوزىنە قاراعاندا، ولار پودەزدگە كىرىپ، پاتەرلەردىڭ ەسىكتەرىندەگى قوڭىراۋلارعا سوعىپ، ۇيدە تۇرعىنداردىڭ بار نە جوق ەكەنىن تەكسەرگەن. پاتەر 13- قاباتتا بولعاندىقتان، كۇدىكتىلەر الپينيستىك جابدىقتاردىڭ كومەگىمەن ءۇيدىڭ شاتىرىنان بالكونعا ءتۇسىپ، وسىلايشا ۇيگە كىرگەن.
كەتكەندە دە وسى جولمەن جۇرگەندىكتەن، زەرگەرلىك بۇيىمدار مەن اقشانى جىمقىرعان.
قازىر بۇلار الپينيستىك جابدىقتاردى پايدالانىپ بىرنەشە پاتەر ۇرلىعىن جاسادى دەگەن كۇدىك بار.
پوليتسيا قىزمەتكەرلەرى ق ر ق ك 188-بابىنا سايكەس تەرگەۋ جۇرگىزىپ جاتىر.