جاسوسپىرىمدەر اراسىنداعى ەرتە جۇكتىلىك وزەكتى ماسەلەگە اينالدى

استانا. قازاقپارات - «جاسوسىپىرىمدەر اراسىنداعى جۇكتىلىك قوعامنىڭ ىندەتىنە اينالۋى مۇمكىن».

قىزىلورداداعى «انا ءۇيى» قايىرىمدىلىق قورىنىڭ قىزمەتكەرلەرى وسىلاي دەپ دابىل قاعۋدا.

ماماندار قوعام دەرتىنە اتا-انا كىنالى مە الدە ءوسىپ جاتقان ورتانىڭ ىقپالى تەرىس پە، ونىڭ ارا- جىگىن اجىراتۋ قيىن ەكەنىن ايتادى.

بالالىقپەن ەرتە قوشتاسقان بويجەتكەن ەسىمىن ايتۋدى ءجون كورمەدى. ايتۋىنشا، 15 جاسىندا سەزىمنىڭ جەتەگىندە كەتىپ، الدانىپ قالعان. شالىس باسقان قادامىن تۋعاندارى دا كەشىرمەگەن. باسار تاۋى قالماعان سوڭ، «انا ءۇيى» ورتالىعىنا كەلىپتى. قازىر باۋىرىندا ەكى ايلىق ءسابيى بار. «شەشەم مەنى قابىلداعان جوق، بىردەن: «كوشەدەگى بالانى مەن باقپايمىن»، - دەدى.

سودان باراتىن جەر بولماعاننان كەيىن وسىندا كەلدىم. كەلگەنىمە وكىنبەيمىن. قازىر قىزىم ەكى ايلىق، دوكۋمەنتتەرىن دۇرىستاپ بەرىپ جاتىر»، - دەيدى ول.

«جاسوسپىرىمدەر اراسىندا، قىزدار اراسىندا جۇكتىلىك وتە كوپ كەزدەسىپ جاتىر، ولاردىڭ جۇكتى بولۋى كوبىسىنە مىناۋ جاسوسىپىرىمدەرگە، بالالارعا ءوزىنىڭ كەرى اسەرىن تيگىزەدى»، - دەيدى قىزىلوردا قالاسىنداعى № 3-ەمحانانىڭ اكۋشەر- گينەكولوگى ەلميرا قالىمبەتوۆا.

شەشەم مەنى قابىلداعان جوق، بىردەن: «كوشەدەگى بالانى مەن باقپايمىن»، - دەدى.

ال 17 جاستاعى تاعى ءبىر بويجەتكەندى، ورتالىقتىڭ قىزمەتكەرلەرى جەزوكشەلەردىڭ ورتاسىنان الىپ كەلىپتى. «بالا نەكەسىز تۋىلاتىن بولعان سوڭ، مەنىڭ اكەم مەنەن باس تارتتى. ونداي قورلىققا شىداماعان بولار. سوسىن جىن- ويناققا قالاي تاپ بولعانىمدى ءوزىم دە بىلمەي قالدىم. قازىر اتا- اناممەن قارىم-قاتىناسىم ۇزىلگەن. بالاممەن وسىندا تۇرىپ جاتىرمىن»، - دەيدى بويجەتكەن.

«جۇكتىلىك جاسارىپ بارادى. بۇل وزەكتى ماسەلەگە اينالدى. قازىر بىزگە 14-15 جاستاعى قىزدار ءجيى تۇسەدى. باستارىنا تۇسكەن باقىتسىز جاعدايدان جالعىز قالعان قىزداردان بولەك، ۇيلەرىنەن قۋىلعان كەلىنشەكتەر دە بىزگە كەلەدى. تىعىرىققا تىرەلگەن قىز- كەلىنشەكتەردى ءوزىمىز دە ىزدەستىرەمىز، تاۋىپ الىپ، وسىندا اكەلەمىز. ەمحاناعا اپارىپ، ماماندارعا كورسەتەمىز. قۇجاتتارىن ازىرلەپ بەرەمىز»، - دەيدى «انا ءۇيى» قايرىمدىلىق قورىنىڭ ۇيلەستىرۋشىسى بايان مولداشيەۆا.

قۇجاتتارىن تۇگەندەپ قانا قويماي، ورتالىقتاعى ماماندار جاس انالاردى ءارى قاراي ءومىر سۇرۋگە بەيىمدەيدى. قازىر ورتالىقتا 18 قىز-كەلىنشەك پەن 15 نارەستە بار. ايەلدەر جاعى ءتۇرلى تاعامدار ازىرلەۋگە، تىگىن تىگۋگە بەيىمدەلۋدە.

ورتالىقتى ولار 3 جىلعا دەيىن پانالاي الادى. وسى ارالىقتا جۇمىس تاۋىپ، قۇجاتتارى ازىرلەنبەك. ايتا كەتەيىك، «انا ءۇيى» ايماقتا بىلتىر اشىلدى. وسى ارالىقتا تۋعاندارىمەن ءتىل تابىسقاندارى دا، اراداعى تۇسىنبەستىكتى جويىپ وتاۋ تىككەندەرى دە كەزدەسكەن. ال ەندى ءبىرى ءالى كۇنگە بولاشاعىنان ءۇمىت كۇتىپ ءجۇر.

استانا تەلەارناسى