ماڭعىستاۋ وبلىسىندا يراندىق تاۋار وندىرۋشىلەردىڭ كاسىپتىك كورمەسى ءوز جۇمىسىن باستادى - فوتو

اقتاۋ. قازاقپارات - يران يسلام رەسپۋبليكاسىنىڭ مازانداران، گۇلىستان، تەگەران، تابريز، حوراسان رازاۆي ايماقتارىنان جانە مەشحەد قالاسىنان كەلگەن تاۋار ءوندىرۋشى كومپانيالار ءتورت كۇنگە سوزىلاتىن كورمەدە مۇناي-گاز ونەركاسىبى مەن مۇناي-حيميا زاۋىتى، اۆتوكولىك ونەركاسىبى باعىتىنداعى تاۋارلاردى، قۇرىلىس ماتەريالدارى مەن ينجەنەرلىك- تەحنولوگيالىق قىزمەتتەردى، اۋىل شارۋاشىلىعى كولىكتەرى مەن قۇرىلعىلارىن، سونىمەن بىرگە تاماق ونىمدەرى مەن كىر جۋعىش ۇنتاقتارىن ۇسىنباق.

بۇل تۋرالى ماڭعىستاۋ وبلىسى اكىمدىگىنىڭ باسپا ءسوز قىزمەتى حابارلايدى.

- «وزدەرىڭىز بىلەتىندەي، ماڭعىستاۋ وبلىسى مەن يران يسلام رەسپۋبليكاسى ايماقتارى اراسىنداعى ءوزارا ءتيىمدى سەرىكتەستىك قاتىناستار 2009-جىلى باستالعان بولاتىن. ماڭعىستاۋ وبلىسى مەن يران رەسپۋبليكاسى اراسىنداعى ساۋدا-ەكونوميكالىق قاتىناستاردى ودان ءارى دامىتۋعا جانە ينۆەستيتسيالاردى تارتۋعا باعىتتالعان بۇگىنگى كورمە دە سونىڭ ءبىر قورىتىندىسى بولىپ وتىر. ەكى ەلدىڭ ىسكەرلىك قارىم-قاتىناستارىنىڭ ارقاسىندا كاسپي ماڭى ەلدەرىنىڭ اراسىنداعى ءوزارا ارەكەتتەستىك دەڭگەيىنىڭ وسەتىنىنە سەنىمدىمىن. يران يسلام رەسپۋبليكاسىمەن جاساسقان ساۋدا-ەكونوميكالىق قاتىناستار يراندىق بيزنەستىڭ دە، قازاقستاندىق بيزنەستىڭ دە دامۋىنا زور ىقپال ەتەدى دەپ ويلايمىن»، - دەپ اتاپ ءوتتى كورمەنىڭ اشىلۋ سالتاناتىندا ماڭعىستاۋ وبلىسىنىڭ اكىمى اليك ايداربايەۆ.

22- شىلدەگە «اتامەكەن» وڭىرلىك كاسىپكەرلەر پالاتاسى مەن مازانداران ايماعىنىڭ اۋىل شارۋاشىلىعى مەن شاحتا، ساۋدا جانە ونەركاسىپ پالاتاسى اراسىنداعى ىنتىماقتاستىق تۋرالى مەموراندۋمعا قول قويىلاتىن «ماڭعىستاۋ وبلىسى مەن يران يسلام رەسپۋبليكاسى ايماقتارىنىڭ ينۆەستيتسيالىق مۇمكىندىكتەرى» اتتى ەكىجاقتى بيزنەس-فورۋم وتكىزۋ جوسپارلانىپ وتىر.

مازانداران ايماعىن باسقارۋشى گۋبەرناتور رابيە فاللاحتىڭ باستاۋىمەن كەلگەن يراندىق بيزنەسمەندەر دەلەگاتسياسى ماڭعىستاۋ وبلىسىنداعى ءبىرقاتار ءىرى كاسىپورىندارمەن، اتاپ ايتقاندا، «اقتاۋ تەڭىز پورتى» ارنايى ەكونوميكالىق ايماعىمەن، كەندىرلى دەمالىس ورىنىمەن جانە وبلىستىڭ ونەركاسىپ نىساندارىمەن تانىسادى.