جاريا ەتۋ اياسىندا دۋبايداعى پاتەر مەن رەسەيدەگى مۇلىك زاڭداستىرىلعان - قارجى مينيسترلىگى

استانا. قازاقپارات - جاريا ەتۋ اياسىندا دۋباي قالاسىنداعى پاتەر مەن رەسەيدەگى مۇلىك زاڭداستىرىلعان. بۇل تۋرالى بۇگىن ورتالىق كوممۋنيكاتسيالار قىزمەتىندەگى اقشالاي قاراجات پەن مۇلىكتى زاڭداستىرۋدى جەڭىلدەتۋ تاقىرىبىنداعى بريفينگ بارىسىندا قارجى ۆيتسە-ءمينيسترى ارداق تەڭگەبايەۆ ءمالىم ەتتى.

ۇسىنىلعان مالىمەتتەرگە قاراعاندا، جالپى اكسيا باستالعالى بەرى ازاماتتار تاراپىنان 48,5 مىڭعا تارتا وتىنىمدەر كەلىپ تۇسكەن. سونىمەن قاتار، جاريا ەتۋ اكسياسى اياسىندا شەت ەلدەردە ورنالاسقان 636 ميلليون تەڭگەگە باعالانعان 17 جىلجىمايتىن مۇلىك زاڭداستىرىلعان.

«بۇل - شەت ەلدەردەگى ءارتۇرلى نىساندار. ولاردىڭ ىشىندە جىلجىمايتىن مۇلىكتەر دە بار. باعالى قاعازدار رەتىندەگى جاريا ەتىلگەن مۇلىكتەر سانى بەسەۋ. قانداي مۇلىكتەر دەگەنگە كەلسەك، مەن رەسەي فەدەراتسياسىندا ورنالاسقان مۇلىك پەن اراب امىرلىكتەرىنىڭ دۋباي قالاسىنداعى پاتەر دە زاڭداستىرىلعانىن ناقتى بىلەمىن. بۇدان بولەك، شەت ەلدەردە ورنالاستىرىلعان اكسيالار مەن وبليگاتسيالاردىڭ بولىكتەرى دە زاڭداستىرىلدى»، - دەدى ارداق تەڭگەبايەۆ.

ۆيتسە-ءمينيستردىڭ ايتۋىنشا، جاڭا زاڭ جوباسى بويىنشا قازاقستان ازاماتتارى ءۇشىن شەت ەلدەردە ورنالاسقان مۇلىكتەر تۋرالى دەكلاراتسيا تاپسىرۋ مىندەتتەلەدى. شەت ەلدەردە مۇلكى بار ءاربىر جەكە تۇلعا ول بويىنشا ءتيىستى ورگاندارعا دەكلاراتسيا وتكىزۋى قاجەت. ونداي دەكلاراتسيا ۇسىنباعاندار دا ايىپپۇل تولەيتىن بولادى.

اۆتور: قانات مامەتقازى ۇلى