مەملەكەتتىك قىزمەتكە شەتەلدەگى قازاقستاندىق مامانداردى تارتۋ كوزدەلۋدە

استانا. قازاقپارات - ق ر ينۆەستيتسيالار جانە دامۋ مينيسترلىگى مەملەكەتتىك قىزمەتكە شەتەلدەگى جوعارى بىلىكتى قازاقستاندىق مامانداردى تارتۋدى كوزدەۋدە.

بۇل تۋرالى كەشە استانادا ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ق ر ينۆەستيتسيالار جانە دامۋ ءمينيسترى اسەت يسەكەشيەۆ ءمالىم ەتتى.

ونىڭ ايتۋىنشا، ونداي قىزمەتكەرلەرگە مينيسترلىك كەيبىر سەكتورلاردا جالاقىنى قايتا قاراۋعا دا دايىن.

 «ادامدار مەملەكەتتىك قىزمەتكە وڭاي كەلۋى ءۇشىن 1 - قىركۇيەكتەن باستاپ ءبىزدىڭ بولىمشەلەر بوس ورىندار تۋرالى اقپاراتتى سايتقا الدىن الا جاريالاپ وتىراتىن بولادى. ءبىز وي- قابىلەتى ەرەكشە جانە بىلىگى جوعارى مامانداردىڭ مەملەكەتتىك قىزمەتكە كەلۋىن قالايمىز. شەتەلدەگى شىن مىقتى، اعىلشىن ءتىلىن ەركىن مەڭگەرگەن ءبىزدىڭ قانداستارىمىزدى وسى جۇمىسقا تارتۋ ءۇشىن كەيبىر سالالاردا جالاقىنى قايتا قاراۋعا دا دايىنبىز»، - دەپ اتاپ ءوتتى مينيستر.

ءا. يسەكەشيەۆتىڭ اتاپ وتكەنىندەي، بۇل ءوز كەزەگىندە مەملەكەتتىك قىزمەت جۇمىسىنىڭ ساپاسىنا وڭ اسەر ەتپەك.

«بىزگە اعىلشىن ءتىلىن مەڭگەرگەن، شەت مەملەكەتتەردە قىزمەت اتقارعان، اشىق ءارى ءتيىمدى جۇمىسقا دايىن ازاماتتار وتە قاجەت. ءبىزدىڭ مينيسترلىك كادرلاردىڭ كەلۋىنە ءاردايىم مۇددەلى بولاتىن. بىزدە شامامەن 50 «بولاشاق» تۇلەگى بار، تاعى 34 ءىن ءبىز وقۋعا جىبەردىك»، - دەپ ءتۇيدى ويىن ءا. يسەكەشيەۆ.

 اۆتور: جاسۇلان جولدىبايەۆ