قازاقستاندىق تاۋار: اقتوبەدە جاسالعان باعدارشام قالا كوشەلەرىنە ورناتىلا باستادى
قازاقستاندىق تاۋار وندىرۋشىلەرگە ارنالعان كورمەگە 30 دان استام كاسىپورىن قاتىستى. اقتوبەلىك جۇمىسشى ۇزاق جىلدار رەنتگەنت قوندىرعىلارىن شىعاراتىن زاۋىتتا جۇمىس ىستەپ، عىلىمي ىزدەنىسپەن شۇعىلدانعان. ونىڭ جوباسىنا جەرگىلىكتى كاسىپكەرلەر پالاتاسى قولداۋ كورسەتىپ، ويدا جۇرگەن باعدارشام شىعارۋ يدەياسىن جۇزەگە اسىردى. ناتيجەسىندە قالا كوشەلەرىندە وتاندىق باعدارشامدار جۇمىس ىستەپ تۇر. تاعى ءبىر جۇرتتىڭ نازارىن اۋدارعانى ۇلكەن جۇك تاسۋ كولىكتەرىنە ارنالعان تىركەمەلەر.
«اقتوبەدە قۇراستىرىلاتىن تىركەمەلەر ەۋروپالىق ستاندارتقا ساي. ونىمگە سۇرانىس جوعارى»، - دەيدى ماماندار.
- ۋاقىتشا ايىندا 5-6 پولۋپريتسەپ شىعارامىز. جۇمىسشىلاردىڭ دا سانىن كوبەيتىپ جاتىرمىز. رەسەيگە ەندى 2 ايدان كەيىن ەكسپورتقا شىعارامىز. قازىر، مىنە، قۇجاتتارىمىز، سەرتيفيكاتتارىمىز ءبارى جوندەلىپ جاتىر، - دەدى كاسىپكەر ەرلان ءابدىعاپپار.
«قازاقستاننىڭ ۇزدىك تاۋارى» وبلىستىق كورمەسىنە قاتىسۋشىلار ءبىر-بىرىمەن ءوزارا تاجىريبە الماسىپ، ءونىمدى باسقا دا ەلدەر نارىعىنا شىعارۋ ماقساتىندا ءوزارا وي ءبولىستى. ءبىر قۋانتارلىعى، اقتوبە وڭىرىندە قۇرىلىس يندۋسترياسىمەن قاتار ازىق-تۇلىك ءونىمىن شىعارۋ سالاسى دا كۇن ساناپ دامىپ كەلەدى. كاسىپكەرلەر جاڭا يننوۆاتسيالىق تەحنولوگيالاردى يگەرۋگە دەن قويعان.
«جىلدان-جىلعا قازاقستاندىق ونىمدەردى وندىرۋشىلەردىڭ سانى ارتىپ كەلەدى. كۇن ساۋلەسىن، جەل ەنەرگياسىن، ياعني بالامالى ەنەرگيالاردى ءارى قاراي حالىققا بەرۋ ماقساتىندا دا جاڭا جوبالار اشىلىپ، سول وزدەرىنىڭ ونىمدەرىن شىعارۋدا»، - دەدى وبلىستىق كاسىپكەرلەر پالاتاسىنىڭ ءتوراعاسى نۇرلىبەك مۇقانوۆ.
ەندى اقتوبەلىك كاسىپورىندار جوعارى ساپالى جانە باسەكەگە قابىلەتتى وتاندىق ونىمدەرىمەن ىشكى نارىقتى عانا ەمەس، وزگە دە ەلدەردىڭ نارىعىن باعىندىرماق. بايقاۋ سوڭىندا ۇزدىك تاۋار شىعاراتىن ءبىرقاتار زاۋىتتار مەن كومبيناتتار ماراپاتتالدى.